Izaya 53 - MUKANDA USANDU WA ZAMBI 1975

¹ Iya hanafuliela lusango wetu? Kuli iya hanasolola kwoko lia Yehova?

² Mumu kumakatatuka kumeso jenyi ngwe lutombo, ngwe muji wa mu mavu omu; keshi ni upeme wa mujimba hanji wa meso hanga tukamutale, chipwe uhenya keshi nawo hanga tukamuzange.

³ Amulelesele, alitunyineye kuli atu. Iye mukwa yinyengo, mukwa kulijilila ni chikulikuli; ngwe umwe atu mamuswekela meso jo, chocho amulelesele. Etu kutwamusele mbunge.

⁴ Chamwenemwene hanambata chikulikuli chetu, hanazundula yinyengo yetu; hindu twamumwene ngwetu, Kanamulambe, kanamulongesa kuli Zambi, kanamupinjisa.

⁵ Alioze ha Utanguko wa yetu amulemekene. Ha uhenge wa yetu amuwondele. Lamba liamushachile lia kutunehena sambukila yetu. Ku mijiji yenyi kanatuwuku.

⁶ Etu eswe hitunatoko ngwe mapanga. Hitunahambuluka mutu mu jila yenyi, mutu mu jila yenyi; alioze Yehova hanamutwika iye uhenge wa yetu eswe.

⁷ Amuhungumionene, amupinjishile, alioze kapakwile kanwa lienyi. Ngwe mwana-panga yoze mamutwala ku ushihilo, ngwe panga mahola kúlú kumeso ja akwa kumutewula, chochene kapakwile kanwa lienyi.

⁸ Amushihile ni yihungumiona ni upatwilo; mba hakachi ka akwa chisemuko chenyi iya wachizewile ngwenyi, Amusutwile ku chifuchi cha akwa mwono, amulambile mumu ha Utanguko wa atu jami?

⁹ Amuselele fuka lienyi hamwe ni yingulungulu, alioze mu kufwa wapwile hamwe ni pichi, mumu kalingile upupilo niumwe. Chipwe kalimbalimba kamuwanyine mu kanwa lienyi.

¹⁰ Hindu Yehova wapalile kumuwonda. Iye hanamumwesa chikulikuli. Muze makapwisa mwono wenyi mulambu ha shili, iye kumakamona munyachi wenyi, kumakasuhisa matangwa jenyi; upale wa Yehova muuwaha mu moko jenyi.

¹¹ Kumakamona mihuko ya lamba lienyi lia mbunge, mba kumakayuka. Kavumbi kami, mwe mukwa ululi, kumakasambisa anji ni chinyingi chenyi. Iye kumakalitwika uhenge wo.

¹² Kashika mungukamwanyina chihanda chenyi hamwe ni akwa ulemu. Yuma ya kupupa mu jita nawa kumakayanyina hamwe ni akwa tachi, mumu wazukwile mwono wenyi mu kutwa, amwalwile hamwe ni yitanguke; wambachile shili ya anji; wahakwilile yitanguke.