Izaya 52 - MUKANDA USANDU WA ZAMBI 1975

¹ Laula Zaione! Laula ukazale tachi je! Yerusaleme, limbo lisandu, zala mazalo je apema, mumu yilima ni akwa luchisa kechi keza nawa kuli yena.

² Ena funge Yerusaleme! Likukumune ukatuke mu fufuta! Chiza malenge ku kota ye, ena funge, mwana-pwo Zaione.

³ Mumu Yehova kanambe ngwenyi, Akulanjishile, ni ndando yakuhi, kashika makukula, ni mbongo jakuhi.

⁴ Mumu Mwene Yehova kanambe ngwenyi, Atu jami apalumukine hatangu ku Engitu akatwameko, mba Ka-Asuria yaapinjisa ni ndando ka.

⁵ Kashika yika nguli nayo se atu jami haakwata chawana? Chocho kanambe Yehova. Akwa kuyula jo kanalili mbimbi. Yehova kanambe ngwenyi, Kakulelesa jina liami tangwa lieswe nganganga.

⁶ Kashika atu jami manyingika jina liami. Kashika ha tangwa lize manyingika, yami ngunahanjika—kuno kunguli.

⁷ Ha milundu cho kuwaha cha molu ja mukwa Sango lipema, yoze wakwambujola sambukila, nikuneha sango lia kuwaha lia yuma yipema, kakwambujola ulamwino; kakwamba kuli Zaione ngwenyi, Zambi ye kanayulu.

⁸ Panjika! Tulayi twe kanalikwiza, kanembi hamuwika mumu ha uwahililo. Mumu kanamono meso ni meso kwiza cha Yehova ku Zaione.

⁹ Enu yihela ya hululu mu Yerusaleme, putukenu mwaso hamuwika, mumu Yehova hanawumbijeka atu jenyi; hanakula Yerusaleme.

¹⁰ Yehova hanasolola kwoko lienyi lisandu kumeso ja mavungu eswe, mba akwa masongo eswe a hashi kumakamona ulamwino wa Zambi yetu.

¹¹ Katukenu! Katukenu! Tuhukenumo! Kanda nukwata ku chuma cha luchisa. Yenu nwakumbata yikwachilo ya Yehova, katukenumo nulipemese.

¹² Mumu kunuchi kakatuka kapupushi; kunuchi kakatuka ngwe nunachina, mumu Yehova kumakanutetekela ni Zambi ya Izalele manufunga kunyima.

¹³ Kavumbi kami mawaha mu milimo yenyi. Kumakanangama ni kuzunduka; kumakapwa kwe kwilu lume.

¹⁴ Chizechene ngwe anji alishimwokene mumu hali iye— ku meso jenyi te hanalumbulako, kapwile nawa ngwe meso ja mutu, kupwa chenyi te kuchalifwile ni kupwa cha mutu—

¹⁵ chocho nawa makakomwesa mavungu anji; mianangana makapakika makanwa jo mumu hali iye. Chize kanda achialweza kumakachimona, ni chize kandevwa kumuchikaalumbunuka.