Izaya 50 - MUKANDA USANDU WA ZAMBI 1975

¹ Yehova kanambe ngwenyi, Mukanda wa noko, wa kumulakula ulihiwo, uze namulakwile nawo? Nanuhanyine tombo kuli iya hakachi ka akwa mikuli yami? Nwalanjiwile mumu ha uhenge wenu; ha Utanguko wenu ahumine noko.

² Muze nejile kuchi te kukwapwile niumwe? Muze nasanyikine kuchi te mukwa kutá wakuhi? Te kwoko liami liahiha, kashika kuliahashile kukula? Tachi chishi najo ja kupulula? Nyongenu, ha liji liami lia kukanda nakuumisa kalunga-lwiji, nakupwisa njiji ngwe puya. Yishi jamo kanakupuka ha kuhona meya, kakufwa ni pwila.

³ Nakujika malilu ni milima; nakwafuka ni chikeleyi.

⁴ Mwene Yehova hanangwehe limi lia mukwa kulongoloka, hanga ngukanyingike kukolesa mukwa yikatalo ni liji. Tangwa ha tangwa ha chimene kakulawisa; kakulawisa twitwi liami ngwivwe ngwe akwa kulongoloka.

⁵ Mwene Yehova hanangujikula twitwi liami, chakolemene, chahilukile kunyima.

⁶ Nahanyine nyima yami kuli akwa kulamba, nahanyine matafu jami kuli akwa kusuta wevu. Chaswekele meso jami ku sonyi ni mate.

⁷ Mumu Mwene Yehova mangukwasa, kashika chichi kutatajala. Kashika hinasa meso jami ngwe liwe lia kahia, ngunanyingika, kechi kungukolesa sonyi;

⁸ mumu mukwa kungusambisa hakamwihi ali. Iya malitachika ni yami? Tumanenu hamuwika. Mukwa kulimika ni yami iya? Alikundame ni yami.

⁹ Mwene Yehova mangukwasa, mukwa kunguhisa iya? Eswe kumakapapujoka ngwe uzalo; ndulu maalia.

¹⁰ Iya hakachi kenu kakuvwila woma Yehova, kakwononoka ku liji lia kavumbi kenyi, kakwenda mu milima, keshi pangu, hindu kakufuliela jina lia Yehova, kakujikijila hali Zambi yenyi?

¹¹ Enu eswe, nwakuwika kahia nikulijingilika ni maleka! Endenu mu chite cha kahia kenu ni maleka aze hinwawika. Alioze chuma munutambula ku kwoko liami, munupomba ni chinyengo.