Izaya 5 - MUKANDA USANDU WA ZAMBI 1975

¹ Ngwimbile mukwa zango liami mwaso wa zango wa kutwala ku munda wenyi wa uva: Mukwa zango liami yapwa ni munda wa uva ha mulundu umwe wa chinuno.

² Yauchipa ni kuchizamo mawe eswe, yatumbamo mitondo yipema ya uva. Yatunga kaposhi wa kalayi ha muchima wawo, yafulamo ukamino wa uva. Yatalatala ukeme uva alioze wemine uva ja mu yambu wika.

³ Kashika, enu nwatwama mu Yerusaleme ni yenu malunga ja Yunda, ngunalembe, patulenu hakachi ka yami ni munda wami.

⁴ Chuma chasalako chika munguhasa kulinga nawa ha munda wami wa uva? Muze nataliletalile ukeme uva kuchi te wemine uva ja mu yambu?

⁵ Mba mungunulweza chize mungulinga ni munda wami wa uva. Munguchizako lusaso wawo, mba mawenyeka. Mungupuzula chipanga chawo, hanga auliateliate.

⁶ Munguupwisa puya, kechi kauteta hanji kuusangula, mba mikalale ni mingonga muyikasoka. Mungutumina malelwa kanda anokaho vula.

⁷ Mumu munda wa uva wa Yehova-wa-Tujita we munyachi wa Izalele, ni malunga a Yunda kapwa wande wenyi upema. Yafupa upatwilo wa kulita, alioze yawana manyinga a kumwanga; yafupa ululi, kumanyi yevwa muteto wika!

⁸ Lamba kuli waze akuwezela zuwo ku zuwo, akuwezela munda ku munda ndo chihela nawa chakuhi, mba makutwamisa ukawe hakachi ka chifuchi.

⁹ Yehova-wa-Tujita halishinga mwe mu matwi jami ngwenyi, Pundu mazuwo anji mapwa amokomoko. Mazuwo anene apema keshi ni waze matwamamo.

¹⁰ Mumu munda wa uva wa kulima ni kumi lia kanga ja ngombe muwima *mbate yimuwika, ni njongo ya *homere yimuwika muyima *efa wika.

¹¹ Lamba kuli waze akulimeneka chimenemene akakaule kunwa chisasu, nikushikama nayo ufuku, ndo vinyu hiyaavundula!

¹² Kali ni tulialia ni yisaji ya kusa, ni tumikupiela, ni ndembo, ni vinyu, ku mizumbu yo; alioze keshi kusa mbunge ku yitanga ya Yehova, chipwe kumona milimo ya moko jenyi.

¹³ Kashika atu jami kakuya ku ufunge, mumu ha kuhona yinyingi; alemu jo kanafu ni zala, ni mbunga yo yinomu ni pwila.

¹⁴ Kashika Shiole hiyokesa solo liayo; hiyatohesa kanwa liayo kuhiana, mba alemu ja Yerusaleme ni mbunga yako kanalundumukako, chihuji chako ni mweswe unalikwiza nayo.

¹⁵ Atu kanahetama, malunga hanalimbuka, ni meso ja akwa kulizata hanaahombola.

¹⁶ Alioze Yehova-wa-Tujita kananangama ni upatwilo wa kulita, mwe Zambi Musandu hanalisolola musandu mu ululi.

¹⁷ Henaho ana-mapanga malia ngwe mu ulilo wo; yimbembe a maji ni ana-pembe malia hakachi ka mazuwo a kupuzula.

¹⁸ Lamba kuli waze kakukoka uhenge ni mihipu ya mahuza; kakukoka shili ngwe ni mihipu ya matemba!

¹⁹ Kakwamba ngwo, Atambukeko, apupwise milimo yenyi hanga tukayimone. Upale wa mwe Musandu wa Izalele Ukundame, wize tuunyingike!

²⁰ Lamba kuli waze akutongola chipi ngwo, chipema, ni chipema ngwo, Chipi; akusumbakenya milima ni pangu, ni pangu ni milima; akusumbakenya chisasu ni chiyema, ni chiyema ni chisasu.

²¹ Lamba kuli waze akulimona ene akwa mana, kakulimona ene kukanyama.

²² Lamba kuli waze anafumana ha kunwa vinyu, kanahamuka ha kuchinga kunwa chisasu.

²³ Kakusambisa chingulungulu mumu ha kutambula chindo, mba kakumina upatwilo kuli mukwa kusamba.

²⁴ Kashika chizechene ngwe mulengi wa kahia kuwakulalisa mwambu umu, chizechene ngwe mwambu umu muunonga mu mulengi, chocho muji wo muupwa kupola, ni yitemo yo muyihehuka ngwe fufuta. Mumu hanalitunu shimbi ya Yehova-wa-Tujita, hanalelesa liji lia mwe Musandu wa Izalele.

²⁵ Kashika utenu wa Yehova wasasaminyine hali atu jenyi. Yazoza kwoko lienyi kulimika no; yaalamba, mba milundu yiyichikima, yivuvu yo yiyipwa ngwe yikongwakongwa hakachi ka matapalo. Chipwe chocho utenu wenyi kuwakondolokele, kwoko lienyi hindu kanalizozo.

²⁶ Iye kumalcalahula ni mbandeira ku vungu limwe liatwama kusuku: kumakalisanyika ni miluzu ku masongo a hashi. Kulineza kapupushi ni fuji! Hatukahi ko

²⁷ niumwe kanevu yikatalo, niumwe kanatalinga, niumwe kananongwoka, hanji kuya tulo; niumwe muya wakokoloka, niumwe lusapo wa haku wapatuka.

²⁸ Mivu yo ya kukalula, mata jo a kunana; sende ja tuvwalu jakala ngwe liwe lia kahia, maroda jo ngwe chijimbi,

²⁹ Kuteta cho ngwe cha ndumba; kanatete ngwe mievu ja ndumba. Kanakenana ha kukwata yifwo yo; kanayimbata mba niumwe mahasa kupulula.

³⁰ Kumakakenanyinako ha tangwa lize ngwe kuchungula cha kalunga-lwiji. Nyi umwe matala ku chifuchi, kumanyi milima ni kupinda, ni mwalwa unala ni malelwa jako.