Izaya 49 - MUKANDA USANDU WA ZAMBI 1975

¹ Panjikenu, akwa mbaka! Ivwenu enu nwatwama kusuku! Yehova wangusanyikine chize ku jimo, kwe ku mujimba wa mama watongwele jina liami.

² Wapwishile kanwa liami ngwe katana wa kuhela, mu Chizulie cha kwoko lienyi wanguswekele, wangupwishile ngwe mwivu wa kucheka, wanguswekele mu chindalo chenyi.

³ Yangwamba ngwenyi, Uli kavumbi kami; ena Izalele munguwana uhenya wami muli yena.

⁴ Alioze yingwamba ngwami, Hinalikatalisa chamokomoko, hinahwisa tachi jami jamokomoko, chafumbwile nichimwe; hindu chize chinalite ni yami chili kuli Yehova, kwononona chami chili kuli Zambi yami.

⁵ Mba haliapwila Yehova yoze wanguwumbile chize ku jimo ngukapwe kavumbi kenyi, ngukahilwise kuli iye Yakomba, hanga Izalele akalikungulule kuli iye, mumu nguli mulemu kumeso ja Yehova, Zambi yami hanapu tachi jami—

⁶ Yehova yono kanambe ngwenyi, Chalela naye hali yena ukapwe kavumbi kami wa kuhuzulula minyachi ya Yakomba, ni kuhilwisa kuli yami waze asala a kuli A-Izalele. Mungukupwisa nawa pangu ku mavungu hanga ulamwino wami ukahete ndo ku songo lia hashi.

⁷ Yehova, mwe Mukwa-Kukula Izalele, kanda Musandu wenyi, kanambe kuli yoze amulelesele chikolo, yoze amuvwilile lwaji ku mavungu, yoze wapwile kavumbi ka akwa kuyula, ngwenyi, Mianangana mamona mba makatuka; alemu mamona mba mafulamana hashi, ha mukunda wa Yehova, mwe mukwa jika, mwe Musandu wa Izalele yoze waatongwele.

⁸ Yehova kanambe ngwenyi, Ha mwaka wa vumbi nakukumbulwile, ha tangwa lia ulamwino nakukwashile. Nakufungile ni kukuhana kuli atu ukapwe usendo, ukakolese chifuchi, ukapangile yihinga kuli akwa kuhona;

⁹ ukambe kuli funge ngwe, Tuhukenu, kuli waze atwama mu milima ngwe, Solokenu. Kumakalia mu jila, ku milundu ya hululu makawana kelo.

¹⁰ Kechi kevwa zala hanji pwila; kechi kalambiwa ni fuji ya chivukuminya chipwe ni mwalwa, mumu mukwa kwavwila keke kumakaatetekela, kumakaasongwela ku mafuji a meya.

¹¹ Kumungukatenga milundu yami yeswe jila; yikoka yami muyikanangama.

¹² Wano kumakeza kusuku, ni wano kumakatuka ku Norte ni ku Chitokelo, ni wano ku chifuchi cha Sinime.

¹³ Imbenu ni uwahililo, enu malilu, ni yena hashi, Likwize! Enu milundu, putukenu ni miaso! Mumu Yehova hanawumbijeka atu jenyi, kumakavwila keke atu jenyi a luyinda.

¹⁴ Alioze Zaione yamba ngwenyi, Yehova hanangwehuka. Mwene wami hananguvulama.

¹⁵ Pwo mahasa kuvulama mwana akwamwisa? Kechi kuvwila keke mwana wa mu jimo lienyi? Hanji o mavulama, hindu ami chichi kavulama yena.

¹⁶ Tala, hinakwola ha mbanda-moko. Yipanga ye ya mawe kumeso jami yili matangwa eswe.

¹⁷ Akwa kukutunga makumba akwa kukupuzula, ni waze akupupile kumakakatuka.

¹⁸ Hetula meso je umone kweswe kwa kujingilika; eswe kanakunguluka, kaneza kuli yena. Yehova kanambe ngwenyi, Ni mwono wami, kumukaazala ngwe chuma cha uhenya, kumukalikashilo ngwe ndungi kakulinga.

¹⁹ Yihela ye ya kupupa, ya hululu, chifuchi che cha kwenyeka, kumuyikapwa yikehe naye hali akwa kutungamo. Waze akuminyine kumakapwa kusuku.

²⁰ Ana aze asemukine ha mwaka we wa utuliwa kumakamba limwe tangwa mu matwi je ngwo, Chifuchi chino changukehela naye, ngusele chihela cha kutwama.

²¹ Henaho muwamba mu mbunge ye ngwe, Iya wangusemenene wano? Ami napwile tuliwa kanda mumba. Napwile mu chifuchi chisuku, wa kulakula, mba iya walelele wano? Ami napwile ukawami; wano kulihi akatukile?

²² Mwene Yehova kanambe ngwenyi, Munguzundula kwoko liami ku mavungu, mungumika mbandeira yami ku minyachi. Mba maneha ana je a malunga mu makondo jo, ni ana je a mapwo a kumbata ha yipaya yo.

²³ Mianangana mapwa akwa kukulela, miazovu mapwa akwa kukwamwisa. Meza nikufulamana hashi kuli yena ni meso jo mu mavu. Makalesa fufuta ya ku yiliato ye. Henaho munyingika yami nguli Yehova; waze akungutwaminyina kechi kevwa sonyi.

²⁴ Mahasa kutambula upite kuli mukwa ndundo? Mahasa kupulula funge ja mukwa kukumba?

²⁵ Yehova kanambe ngwenyi, Chipwe funge ja mukwa ndundo maatambula, chipwe funge ja mukwa kupinjisa maapulula, mumu mungulitachika ni waze akulitachika ni yena, mungulamwina ana je.

²⁶ Waze anakupinjisa mungwalisa musunya wo ene. Kumakazengewa ni manyinga jo ene ngwe hanwa vinyu. Henaho atu eswe manyingika yami nguli Yehova, Chilamwina che, kanda Mukwa-Kukukula, kanda Mukwa-Ndundo wa Yakomba.