Izaya 48 - MUKANDA USANDU WA ZAMBI 1975

¹ Panjikenu chino, enu akwa munyachi wa Yakomba, enu hanwaha jina lia Izalele, ni yenu nwasemukine kuli Yunda. Nwakulishinga ni jina lia Yehova, mwakutayiza Zambi ya Izalele, alioze kunwachilingile ni umwenemwene ni ululi.

² Mumu nwakulisa jina lia chihunda chisandu, nwakujikijila hali mwe Zambi ya Izalele, jina lienyi Yehova-wa-Tujita.

³ Yuma ya kunyima nayisolwele kushi. Yatuhukile mu kanwa liami, nayambulwile; mba susumuku nayilingile, yapwile.

⁴ Se ngunanyingika nuli akwa pami, kota jenu japwa ngwe mujipwa wa utale, ni mahuma jenu ngwe unengu,

⁵ kashika nanwambulwilileyo chize ku shakulu. Shimbu kanda yipwa nanulwezeleyo, kuchina te munwamba ngwenu, Hamba liami wachilingile, hanji kaponya kami wa kwola, hanji kaponya kami wa kuzuzulula wachitumine.

⁶ Hinwevwa, haliapwila talenu yino yeswe. Kunuchi kuchambulula nyi? Chize ku tangwa lino mungukanuvwisa yuma yaha, yuma ya kuhengeka yize kanda nuyinyingika.

⁷ Hayilinga haliapwila, hi ku shakulu ko; ndo musono te kunwayimwene nilimwe tangwa, kuchina munwamba ngwenu, Nachinyingikine kulu.

⁸ Kunwachivwile, kunwachinyingikine nilimwe tangwa, chize ku shakulu kajikwile matwi jenu. Mumu nanyingikine ngwami, Munulinga ni mafwefwe anji. Chize ku kusemuka chenu nuli akwa kukolema.

⁹ Ngunasúla utenu wami mumu ha jina liami, ngunaukokolola hali yenu ha mukunda wa uhaliso wami, mumu chazangile kunusutula.

¹⁰ Hinanupemesa, alioze hi ngwe prata ko, hinanweseka mu lutengo wa luyinda.

¹¹ Ha mukunda wa yami ngunachilingi, ha mukunda wa yami mwene, mumu kuchi mungutayiza jina liami likajiluke? Uhenya wami chichi kauhana kuli mukwo.

¹² Panjikenu kuli yami, enu A-Yakomba, ni yenu A-Izalele nanusanyikine. Yami mwene, nguli mutangu, ni mwe kasula-songo.

¹³ Kwoko liami Uasele fundamentu ya hashi; kwoko liami lia chindume liazazulwile malilu. Muze munguyisanyika, muyikalimanyina hamuwika.

¹⁴ Enu eswe, kungulukenu nwivwe! Iya hakachi ko hanambulula yino yuma? Yehova kanamuzange, kumakamanununa hali A-Babilonia chize hanafunjika; kwoko lienyi mulikalimika ni A-Kaletea.

¹⁵ Yami hinahanjika ni kumusanyika, yami mwene. Hinamuneha, mba kumakawaha mu jila yenyi.

¹⁶ Kundamenu kuli yami nwivwe chino chuma. Chize ku uputukilo chahanjikile ku tenga. Chize ku miaka ya chino chuma, ni yami kunguli. Haliapwila Mwene Yehova hangutuma hamwe ni Spiritu yenyi.

¹⁷ Yehova, Mukwa-Kunukula, mwe Musandu wa Izalele, kanambe ngwenyi, Yami nguli Yehova Zambi yenu, yoze wakunulongesa hanga nukalumbunuke, yoze wakunusongwela mu jila yize Chanutamba kuya.

¹⁸ Mala! Nyi kachi nwevwile shimbi jami! Kachi uhwimino wenu wapwa ngwe lwiji, kachi ululi wenu wapwa ngwe mikanya ya kalunga-lwiji.

¹⁹ Kachi ana jenu hapwa ngwe masekeseke, ni waze masemuka kuli yenu hapwa ngwe mawundu ja masekeseke. Kachi jina lio nilimwe tangwa muujimuka hanji kunonga kumeso jami.

²⁰ Katukenu ku Babilonia! Chinenu Kaletea! Ambululenu chino ni liji lia kulikwiza, chivwisenu! Tumenu liji lino ndo ku songo lia hashi. Ambenu ngwenu, Yehova hakula kavumbi kenyi Yakomba.

²¹ Ha kwasongwela mu mapuya kevwile pwila; waachijilile meya mu liwe; wapulile liwe, mba meya apukukileko.

²² Yehova kanambe ngwenyi, Uhwimino kuushiko kuli yingulungulu.