Izaya 47 - MUKANDA USANDU WA ZAMBI 1975

¹ Ena Babilonia, mwana-pwo wa virgem, Palumuka ukatwame mu fufuta. Twama hashi ni ngunja yakuhi, ena mwana-pwo wa A-Kaletea! Mumu kechi kakutongola nawa ngwo, Mwovu kanda mulelu.

² Anda mawe Ukatwe no wunga, Chiza wanda we, zula hina lie, ufukule molu je ukapalike ndusu mu njiji.

³ Makufukula uselesele we, mba sonyi je mujikamoneka. Mungufwetesa; chichi kuvwila keke niumwe.

⁴ Mukwa-Kutukula—iye mwe Musandu wa Izalele, jina lienyi Yehova-wa-Tujita.

⁵ Ena mwana-pwo wa A-Kaletea, twama nikuhola, ukaye ku milima, mumu kechi kakutongola nawa ngwo, Mukwa kuyula mawanangana.

⁶ Natenukine ni atu jami, najilwile chihinga chami, naakunjikile mu kwoko lie, ni yena kwaavwilile keke. Chipwe hali tushinakaji walemesene kanga ye kuhiana.

⁷ Yiwamba ngwe, Munguyula miaka yeswe, kashika yino yuma kwayisele mbunge, chipwe kwiwuluka songo liayo.

⁸ Kashika panjika chuma chino, ena wakuzanga chiseke, watwama ngú. Unambe mu mbunge ye ngwe, Yami nguli, mba kukushi mukwo. Chichi kutwama tuliwa, hanji kunyingika kufwisa ana.

⁹ Yino yuma yiali muyiza kuli yena susumuku, ha tangwa limuwika; ngwami, kufwisa ana ni utwamishi muyikushata liakulu; chipwe uli ni umbanda unene, ni tachi jinji ja wanga we.

¹⁰ Wajikijilile ni ungulungulu we, nikwamba ngwe, Kangumwene niumwe. Mana je ni yinyingi ye yakwongele, mba wambile mu mbunge ye ngwe, Yami nguli, mba kukushi mukwo.

¹¹ Alioze chipi muchikuwana, chimwe kuchi kahasa kuchikukila. Kuji-ni-tomo mulikakulundumukina, limwe kuchi kahasa kufwetela. Susumuku utoke muukakuwana umwe kwaunyingikine.

¹² Jikijila mu wanga we, ni umbanda we wunji uze watala nawo chize ku ukweze we. Hanji muhasa kukumba; hanji muhasa kuvwisa mwongo akwenu.

¹³ Jakuhwa ni yiyulo ye yinji; alimanyine akulamwine, waze akwa kufunjika malilu, akwa kutala matongonoshi, waze ha kumona kakweji mwaha kakukulweza yize muyiza kukuwana.

¹⁴ Kumanyi hapwa ngwe mwambu. Kahia kakwalalisa, alioze o kahashile kulilamwina ku tachi ja milengi. Kahia kano hi makala ko a kwota, hanji jiko kuze muhasa kutwamako.

¹⁵ Kuli yena chocho anapu waze wahondangana no, hasepa ni yena chize ku ukweze we. O kakulihiza mutu mweswe mu jila yenyi, alioze yoze makulamwina wakuhi.