Izaya 46 - MUKANDA USANDU WA ZAMBI 1975

¹ Mbele kanafukama, Nebo kanahetama. Tuponya two hali tushitu ni yimuna ali; yuma nunambata ya kutwika ngwe yiteli hali tushitu a yikatalo.

² Kanahetama, kanafukama hamuwika, kahashile kulamwina che chiteli, se ene nawa kanayi ku ufunge.

³ Enu akwa munyachi wa Yakomba, eswe nwalisalaho ku munyachi wa Izalele, panjikenu kuli yami. Hinanumbata chize ku kusemuka chenu, hinanuzundula chize ku jimo.

⁴ Ndo ku ushinakaji wenu hindu Yami Nguli, mungukanumbata ndusu ni kambu jitoma. Yami natangile ni yami munguzundula; mungumbata, mungulamwina.

⁵ Neya munungupwisa tukapwe chimuwika? Neya munungutesa tukalifwe?

⁶ Waze akumwanga oru ya mu ngonga jo, kakupezalisa prata ha mbalansa, kakulakenya ndando kuli fuli ya oru, mba machitenga umwe zambi, mba o mafulamana ni kuwayila!

⁷ Kakumuzundula ha yipaya yo nikumumbata; kakumumika homa henyi, mba hahene makamana, kahashile kukatukako. Chipwe umwe mateta kuli iye kechi kakumbulula, hanji kumulamwina ku lamba lienyi.

⁸ Iwulukenu chino nukazewule. Shinginyekenu ha chuma chino, enu yitanguke,

⁹ iwulukenu yuma yize hiyapalika kushi; mumu yami Zambi, kukushi mukwo; yami Zambi, kukushi umwe wa kulifwa.

¹⁰ Nikulumbununa songo chize ku uputukilo. Chize ku shakulu nakulumbununa yuma kanda ayilinga, nikwamba ngwami, Upale wami muukakola, kumungukalinga chize nafunjikile.

¹¹ Mungusanyika kajila umwe wa kushiha yifwo ku Chivumbuko, mungusanyika ku chifuchi chisuku mutu yoze nafunjikile. Hinahanjika, munguchimanununa. Hinachifunjika, mba munguchilinga.

¹² Panjikenu kuli yami, enu akwa mbunge ja pami, enu nuli kusuku ni ululi.

¹³ Mungukundamisa ululi wami, kuwapwile kusuku ka. Ulamwino wami kuuchi kalaluka. Mungusa ulamwino mu Zaione, hali Izalele uhenya wami.