Izaya 45 - MUKANDA USANDU WA ZAMBI 1975

¹ Yami Yehova ngunambe kuli Siru yoze nawayishile ni maji, ngwami, nakwachile ku kwoko lienyi lia chindume hanga akapokwese mavungu kumeso jenyi, akajitule miya ya mianangana, akazulule mapito kumeso jenyi hanga kechi kahasa kwajilako.

² Ngwami, Mungukutetekela, mungusalamisa milundu, mungupatula tuyipinji mapito a unengu, mungupatwola njalo ja utale.

³ Mungukwaha upite wa milima ni yuma ya kulumbika ku tenga ukanyingike yami Yehova, Zambi ya Izalele, ngunakusanyika ni jina lie.

⁴ Ngunakusanyika ni jina lie ha mukunda wa kavumbi kami Yakomba, Izalele yoze natongwele; ngunakuwezela jina likwo chipwe yena kwangunyingikine.

⁵ Yami nguli Yehova, mba kukushi mukwo, kukushi Zambi mukwo shina yami mwene. Chipwe kwangunyingikine ngunakuse muya,

⁶ hanga atu akanyingike chize ku kuvumbuka cha tangwa ni ku Chitokelo— kukushi niumwe mukwo shina yami mwene. Yami nguli Yehova, mba mukwo wakuhi.

⁷ Nakulinga pangu, nakutanga milima, nakulinga yipema, nakutanga lamba, yami nakulinga yuma yino yeswe, mwe Yehova.

⁸ Enu malilu nokesenu kwilu! Kwilu ako! Zukulenu ululi! Ni hashi hapakuke hanga ulamwino usoke, ni ululi ukatatukileko nawa, Yami Yehova nachitangile.

⁹ Lamba kuli yoze malitachika ni Tangi yenyi, ndeho ya uma hakachi ka ndeho ni jikwo ja hano hashi. Te uma muwamba kuli mukwa kuwumba ngwenyi, Yika unatenge? hanji, Moko akuhi?

¹⁰ Lamba kuli yoze mamba kuli chisemi ngwenyi, Yika unaseme? Hanji kuli pwo ngwenyi, Unafumbajala neka?

¹¹ Yehova, mwe Musandu wa Izalele, kanda Tangi yenyi kanambe ngwenyi, Te musopa ni yami ha kutwala kuli anami? Ukangutumine ha kutwala ku milimo ya moko jami?

¹² Nalingile hashi, natangileho mutu. Moko ja yami mwene azazulwile malilu; yami natumine mbunga yako yeswe.

¹³ Hinamusongojola mu ululi, mba mungukalulamisa majila jenyi eswe. Kumakatunga chihunda chami, ni kutusula atu jami atwama kusuku ni mahio; kechi kachilinga mumu ha ndando hanji kwononona. Chocho kanambe Yehova-wa-Tujita.

¹⁴ Yehova kanambe ngwenyi, Upite wa Engitu ni yuma ya kutalika ya A-Etiopia, ni A-Shipa, malunga anene, muyikeza kuli yenu, muyikapwa niyenu. Makanukaula. Makeza mu malenge nikuhetamina hashi kuli yenu. Kumakalemba kuli yenu ngwo, Zambi kakutwama ni yenu wika, ni kukushi mukwo, niumwe zambi shina iye mwene.

¹⁵ Pundu, yena Zambi ya Izalele, mwe Chilamwina, uli umwe Zambi wakuswama.

¹⁶ Atu akwo eswe kakwivwa sonyi ni kutatajala, ni akwa kulinga tuponya kakutatajala hamuwika.

¹⁷ Alioze Yehova kakulamwina A-Izalele ni ulamwino wa mutolo. Enu kunuchi kevwa sonyi chipwe kutatajala ku miaka ya mutolo.

¹⁸ Mumu Yehova, Tangi ya malilu (iye Zambi), yoze wawumbile hashi nikuhalinga, (wahakolesele, kahatangile ha hululu, wahatangile hanga atu akatwameho); yono Yehova kanambe ngwenyi, Yami nguli Yehova, kukushi mukwo.

¹⁹ Chahanjikile ku tenga, mu chifuchi chimwe cha milima. Chambile kuli ana ja Yakomba ngwami, Ngufupenu homa ha hululu. Yami Yehova nakuhanjika umwenemwene, nakwambulula chize chinalite.

²⁰ Kungulukenu nwize; kundamenu hamuwika, enu kunwafwile hakachi ka akwa mavungu. Waze akumbatambata tuponya twa mitondo, nikulemba kuli umwe zambi kahashile kulamwina, o keshi yinyingi.

²¹ Ambululenu chikuma chenu nukachilumbunune. Atwame punga. Yoze walwezele chuma chino kulu, iya? Yoze wachambulwilile ku miaka ya kushi, iya? Hi yami ko, Yehova? Kukushi nawa zambi mukwo shina yami mwene, Zambi ya ululi, Chilamwina; kukushi mukwo shina yami mwene.

²² Tewulukilenu kuli yami akanulamwine, enu eswe mu masongo a hashi! Mumu yami nguli Zambi, kukushi mukwo.

²³ Nalishingile ni yami mwene. Liji limwe hiliatuhuka mu kanwa liami mu ululi, kulichi kuhasa kuhiluka kunyima, ngwami, Kungunwa lieswe mulikazondama kuli yami, ni limi lieswe mulikalishinga.

²⁴ Kumakachamba ha kutwala kuli yami ngwo, Muli Yehova wika mwatwama ululi ni tachi. Waze eswe amuvwilile wuli kumeza kuli iye ni sonyi.

²⁵ Muli Yehova ana eswe a Izalele makumba ni kulisamba.