Izaya 44 - MUKANDA USANDU WA ZAMBI 1975

¹ Alioze ivwa haliapwila, ena kavumbi kami Yakomba, ena Izalele nakutongwele.

² Yehova yoze wakutangile, wakuwumbile mu jimo makakukwasa, kanambe ngwenyi, Kanda wivwa woma kavumbi kami Yakomba, ena Yeshurene nakutongwele.

³ Mumu munguzukula meya ha chifuchi cha pwila, mungusa yitwetwe hashi homu. Munguzukula Spiritu yami hali ana je; munguzukula uwape wami hali waze mukasema.

⁴ Kumakasoka ngwe alamo a wisu, ngwe yiseso ku yitwetwe.

⁵ Umwe mamba ngwenyi, Ami nguli wa Yehova; mukwo maliluka jina lia Yakomba; mukwo masoneka ha kwoko lienyi, Wa mbala wa Yehova, ni kuliwezela jina likwo ngwenyi, Izalele.

⁶ Yehova, Mwanangana wa Izalele, Mukwa-Kukula, Yehova-wa-Tujita kanambe ngwenyi, Yami mutangu ni yami kasula-songo; kukushi zambi niumwe shina yami mwene.

⁷ Iya walifwa ni yami? Achambe, achambulule, ni kuchilumbununa kumeso jami. Iya hanambulula kushi yuma yize muyizaho? Atulweze yize muyiza kwiza hindu.

⁸ Kanda nwivwa woma, mwongo kanda unukwata. Te chanulwezele chize ku shakulu nikuchambulula? Ni yenu nuli yela. Kwali umwe Zambi hamwe ni yami? Luliwe lukwo kulushiko; chalunyingikine.

⁹ Akwa kulinga tuponya kapwa amokomoko; yuma yize yaawahila kuyafumbukile. Yela jo kamwene, kanyingikine. Kumakaakolesa sonyi.

¹⁰ Mukwa kweseka umwe zambi hanji kuzuzulula kaponya yoze kafumbukile iya?

¹¹ Atu jenyi eswe mevwa sonyi. Yilangaji, no nawa atu tuhu. Alikungulule, amane; eswe mevwa mwongo, eswe maakolesa sonyi hamuwika.

¹² Mwe fuli kakweseka kaponya, ni kumululika ha makala. Kakumufula ni mihato, kakumufula ni kwoko lienyi lia tachi. Kakwivwa zala, kakuhonga, keshi kunwa meya, kanevu ndwezo.

¹³ Karpinteru kakulema muhipu ni kufunjika ni lapi. Kakweseka ni palaina ni kompaso kaponya wa kulifwa ni mutu, ni upeme wa mutu, akatwame mu zuwo.

¹⁴ Kakupakula mitondo ya sedru; hanji matongola mutondo wa kupresu hanji carvalho ndo muutatuka hakachi ka mitondo ya mu musenge; kakutumba mutondo wa sedru, mba vula mautatwisa.

¹⁵ Muupwa kunyi ja atu, mba matambula chihanda chawo ni kuchota. Hanji mawika kahia ni kwocha mbolo, mba malinga nawa umwe zambi ni kumuwayila. Malinga kaponya wa kwola ni kufulamana kumeso jenyi.

¹⁶ Chihanda kakutenga kunyi ja kwota; chihanda chapwa cha yifwo ya kulia, kakwocha yifwo ni kukuta. Kakwota nikwamba ngwenyi, Mba hinavuma, hinamona kahia.

¹⁷ Mba chize chalisalaho kakuchitenga zambi yenyi, hanji hamba lienyi. Kakufulamana kumeso jenyi ni kuwayila. Kakulemba ngwenyi, Ngupulule, mumu uli zambi yami.

¹⁸ Kanyingikine, kuchaalumbunukine mumu iye hayika meso jo, kashika kahashile kumona. Hayika manyonga jo, kashika kahashile kunyingika.

¹⁹ Niumwe kakuzewula; chinyingi chakuhi hanji malinjekela a kwamba ngwenyi, Chihanda nasele ha jiko, nochele mbolo ha makala jawo, nochele yifwo, nalile, kafwa te mungutenga chihanda chize chalisalaho chizelwokeso? Mungufulamana kumeso ja pinji ya mutondo?

²⁰ Kakulia uto, mutwe wenyi wa kwongoloka hiwamupiangula; kahashile kulipulula, hanji kwamba ngwenyi, Chongo nguli nacho mu kwoko liami lia chindume.

²¹ Iwuluka yino yuma Yakomba, ni Izalele, mumu uli kavumbi kami. Nakuwumbile, Izalele, uli kavumbi kami. Chichi kakuvulama.

²² Hinajimuna utanguko we ngwe lelwa. Hinajimuna milonga ye ngwe mbundu. Hiluka kuli yami mumu nakukulile.

²³ Enu malilu, imbenu, mumu Yehova hanachilingi; kololoka ena hashi uli mushi; enu milundu putukenu kwimba; ni yenu usaki ni mitondo yeswe yilimo! Mumu Yehova hakuta Yakomba, kumakawana uhenya muli Izalele.

²⁴ Yehova, Mukwa-Kukukula, yoze wakuwumbile chize mu jimo, kanambe ngwenyi, Yami nguli Yehova, Tangi ya yuma yeswe, mukwa kuzazulula malilu ukawami, mukwa kuzazulula hashi—te iya napwile nenyi?

²⁵ Mukwa kufuwisa yinyingi ya akwa mahuza, kakuhepwisa tahi, kakuhilwisa kunyima akwa mana, nikupwisa mana jo uhepuke;

²⁶ kakukolesa liji lia kavumbi kenyi, kakulinga longeso lia mikeji jenyi; kakwamba ha kutwala ku Yerusaleme ngwenyi, Atu matwamamo; kakwamba ha kutwala ku yihunda ya Yunda ngwenyi, Kumuyikatungiwa; mungutungulula yize yapuzuka.

²⁷ Kakwamba ku kalunga-lwiji ngwenyi, Oma, munguumisa njiji je.

²⁸ Ha kutwala kuli Siru kakwamba ngwenyi, Iye kafunga kami, kumakamanununa upale wami weswe; ha kutwala ku Yerusaleme kanambe ngwenyi, Kumuyikatungiwa! Ha kutwala ku tembele ngwenyi, Kumakasa fundamentu ye.