Izaya 43 - MUKANDA USANDU WA ZAMBI 1975

¹ Alioze haliapwila Yehova yoze waatangile yena Yakomba, yoze wakuwumbile yena Izalele, kanambe ngwenyi, Kanda wivwa woma mumu hinakukula; hinakutongola ha jina lie, uli niwami.

² Ha kupalika mu meya mungukapwa hamwe ni yena, ndusu mu njiji, kujichi kakukumba. Ha kwenda mu kahia kuchi kawema; mulengi wako kuuchi kakulalisa.

³ Mumu nguli Yehova Zambi ye, mwe Musandu wa Izalele, Chilamwina che. Nahanyine Engitu kupwa ndando ya ukule we. Nakulanjile ni Etiopia ni Sepa.

⁴ Mumu wapwile wa kuzanga kumeso jami, ni mulemu, nakuzangile, kashika nasumbakenyene malunga kukulanda, nahanyine mavungu ha kulamwina mwono we.

⁵ Kanda wivwa woma mumu nguli hamwe ni yena. Munguneha ana je ku Chivumbuko, ni ku Chitokelo mungukukonga.

⁶ Mungwamba ku Norte ngwami, Echako! Ku Sule mungwamba ngwami, Kanda ulalaminya! Chizenu ana jami a malunga kusuku; chizenu anami a mapwo ku songo lia hashi,

⁷ waze eswe naalukile jina liami, waze naatangile ha uhenya wami, ni kwawumba ni kwalinga.

⁸ Nehenu tupuputa waze ali ni meso, nehenu afwa-matwi waze kakwivwa.

⁹ Mavungu eswe akunguluke hamuwika, akwa minyachi aswile. Iya hakachi ko mahasa kulumbununa chino, hanji kutulweza yuma yize hiyapalika? Anehe yela jo waze maasambisa, akevwe akatayize ngwo, Chamwenemwene.

¹⁰ Yehova kanambe ngwenyi, Enu nuli yela jami, kavumbi kami wa kutongola, hanga nukangunyingike nuka ngufuliele nukase chinyingi, Yami Nguli. Katangile niumwe zambi wakunguliangila kulutwe, chipwe kunyima yami kechi kapwako,

¹¹ Yami, yami nguli mwe Yehova. Niumwe chilamwina keshiko shina yami mwene.

¹² Yehova kanambe ngwenyi, Nuli yela jami, shimbu te kunushi niumwe zambi weka hakachi kenu yami nalumbunwine, yami nalamwinyine, yami nambulwile.

¹³ Yami Zambi, ni ndo ku songo Yami Nguli. Niumwe mahasa kupulula ku kwoko liami. Nakulinga, mba niumwe mangukwika.

¹⁴ Yehova Mukwa-Kunukula, mwe Musandu wa Izalele kanambe ngwenyi, Ha mukunda wa yenu mungukatuma ku Babilonia, mungukamakuna njalo jeswe, mba kukalumioka cha A-Kaletea muchalumuka kulila mbimbi.

¹⁵ Yami nguli Yehova, Musandu wenu, Tangi ya Izalele, mwe Mwanangana wenu.

¹⁶ Yehova yoze wakupula jila yenyi mu kalunga-lwiji, wakusa Chikoka chenyi mu meya a ndundo,

¹⁷ yoze wakuchiza temba-lia-jita ni kavwalu, ni mbunga ya tujita, kanapombo, kahashile kuhinduka, hanasutuka, hajima ngwe wanda wa ndeya. Yehova yono kanambe ngwenyi,

¹⁸ Kanda nwiwuluka yuma ya kushi, kanda nuzewula yuma ya miakulwila.

¹⁹ Ngunalingi yuma yaha, kuyinasoloka, kunwayimwene? Mungupula jila mu puya, mungusa njiji mu kango.

²⁰ Ngongo mangulemesa, mikuza ni yikungulu, mumu ngunahana meya mu puya, njiji mu kango ngukanwise atu jami a kutongola,

²¹ atu aze nawumbile hali yami mwene hanga akambulule uhaliso wami.

²² Hindu yena Yakomba, kwangutambikile; ena Izalele, waliseka ni yami.

²³ Kunwanehene kuli yami mapanga ha milambu ya kulumba. Kunwangulemesene ni yitapo yenu. Ami chanuvwishile kulema ni milambu, chanukatalishile ni libano.

²⁴ Kunwangulanjilile ni mbongo mishachi yiyema. Kunwangukuchishile ni maji a milambu yenu. Alioze enu nwanguvwisa kulema ni milonga yenu, nwangukatalisa ni uhenge wenu.

²⁵ Yami, Yami Nguli mwe mukwa kujimuna Utanguko wenu ha mukunda wa yami mwene; chichi kewuluka nawa milonga yenu.

²⁶ Nungwiwulule tukasope; lumbununenu chikuma chenu nukasambe.

²⁷ Kalamba kenu mutangu wavulumwine, ni mahako jenu atangwile shimbi jami.

²⁸ Kashika najilwile alemu a muma musandu; nakunjikile Yakomba akanonge liakulu, nakunjikile Izalele ku sau.