Izaya 42 - MUKANDA USANDU WA ZAMBI 1975

¹ Talenu kavumbi kami yoze ngunamukundwiza, yoze wa kusakula kuli yami, mbunge yami yinawahilila muli iye. Hinamusa Spiritu yami, kumakasolola ululi kuli akwa mavungu.

² Kechi kukololoka, hanji kukalumioka, kechi kuvwisa liji lienyi mu tapalo.

³ Lumbungu wa kuwondewa kechi kamakuna, wanda unatuhwisa mwishi kechi kaujima, mba kumakasolola ululi nikulita ni umwenemwene.

⁴ Kechi kakokoloka hanji kuhonga ndo hanakolesa ululi hano hashi. Akwa mbaka kanatwaminyina shimbi yenyi.

⁵ Zambi Yehova, Tangi wa malilu kanda mukwa kwazazulula, yoze wazazulwile hashi ni yize yeswe yakwizaho, yoze wakuhana mwiku kuli atu eswe aliho, kakuhana Spiritu kuli akwa kwendelaho eswe, aye kanambe ngwenyi,

⁶ Yami Yehova nakusanyikine ni ululi, nakukwachile ku kwoko nikukufunga; hinakuhana ukapwe usendo kuli atu, pangu ku mavungu,

⁷ ni kulawisa meso ja tupuputa; kuchiza funge ku zuwo lia ususu, ni waze anatwama funge mu milima kwachizamo.

⁸ Yami Yehova, lie jina liami alio; uhenya wami chichi kuhana kuli niumwe mukwo. Chichi kuhana uhaliso wami ku tuponya twa kwola.

⁹ Yuma ya kushi, yeswe hiyapwa, haliapwila yuma yaha ngunambulula. Shimbu kanda yichisoloka ngunanwambulwilayo.

¹⁰ Imbilenu Yehova mwaso waha, imbenu uhaliso wenyi ndo ku songo lia hashi! Kalunga-lwiji akakulunguze, ni yize yeswe yilimo, ni mbaka ni waze atwamako.

¹¹ Puya ni yihunda yako akakololoke, ni yihunda ya A-Keta; waze atwama mu Sela akembe ni uwahililo, akalumioke kwe ku mbulwa milundu.

¹² Akachichimieke Yehova, akambulwile uhaliso wenyi mu yifuchi ya ku mbaka.

¹³ Yehova kanatuhuka ngwe mutu wa ndundo, ngwe kajita kanavundula ufwatulo wenyi. Kanakololoka, kanakalumioka, kanalisolola mukwa ndundo wa kulimika ni akwa kole jenyi.

¹⁴ Ha shimbu linene hinahola, natwama chizechene nikusúla. Haliapwila munguteta ngwe mukwa kufumbajala, munguhwimashana, munguhwilijela.

¹⁵ Mungupwisa ya hululu milundu ni mindundena; munguumisa yiputa yako yeswe. Mungupwisa njiji ngwe matungu, nikuumisa mashima.

¹⁶ Mungusongwela tupuputa kuze kanyingikineko. Mu majila kanyingikine mungwatalikisa. Milima yize yili kumeso jo mungupwisa pangu, mungusalamisa kuze kwapwa kwa yikulinga-yikulinga. Yino yuma mungulinga, chichi kwaehuka.

¹⁷ Waze anafuliela tuponya twa kwola, waze akwamba ku tuponya twa kuzuzulula ngwo, Nuli mazambi jetu, o maahilwisa kunyima ni kwakolesa sonyi.

¹⁸ Afwa-matwi, panjikenu! Talenu, tupuputa, hanga nukamone!

¹⁹ Iya wapwa kapuputa ngwe kavumbi kami? Iya wapwa kafwa-matwi ngwe kanganda kami yono ngunatumu? Iya wapwa kapuputa ngwe yoze unalitumbikila kuli yami? Iya wapwa kapuputa ngwe kavumbi ka Yehova?

²⁰ Yuma yinji anamono alioze kayipalile; matwi jenyi awashi alioze kapanjikile.

²¹ Yehova wevwile kuwaha mumu ha ululi wenyi, ha kufumanyisa shimbi yenyi nikuyipwisa ya uhenya.

²² Alioze wano kapwa munyachi wa kweya ni kwapupa. Eswe kanakwachika mu mena, kanaahengeka mu mazuwo a ususu. Hanakwachika kuli akwo ni yoze maapulula wakuhi; hapwa ngwe a kupita, ni yoze mamba ngwenyi, Hilwisenu, wakuhi.

²³ Iya hakachi kenu mapanjika chuma chino? Iya machisa mbunge ni kwivwa ha miaka yize yinezaho?

²⁴ Yoze wakunjikile Yakomba kuli akwa kupupa iya? Yoze wahanyine Izalele kuli yingumba iya? Hi Yehova ko yoze twamuvulumwine? Mumu kendele mu ndako jenyi, kononokene ku shimbi yenyi.

²⁵ Kashika wazukwile hali iye kusasaminya cha utenu wenyi, hamwe ni ndundo jenyi ja jita. Wamuchochekele kahia kwa kujingilika, alioze kuchamulumbunukine. Wamwochele alioze kachisele mbunge.