Izaya 41 - MUKANDA USANDU WA ZAMBI 1975

¹ Enu akwa mbaka! Holenu nupanjike kuli yami; mavungu ahuzulule tachi jo; akundame, mba mahanjika; tulikundamenu hamuwika tukasope.

² Iya wanehene mukwa Chivumbuko mukwa kuwana kukumba mu kwenda chenyi cheswe? Kakumukunjika mavungu, kashika kakuliachila mianangana hashi; ni katana kenyi kakwafwenya ngwe fufuta, ni uta wenyi kakwahehula ngwe yizungu.

³ Kakwahanga, ni kuhiana nawa, ni chipi chakuhi, ku majila molu jenyi kanda aliatamo.

⁴ Iya hamanununa nikulinga chuma chino, ni kusanyika yisemuko chize ku uputukilo? Yami, Yehova, mutangu, ni yami nguli hamwe ni asula, Yami Nguli.

⁵ Akwa mbaka hamona, hevwa woma; masongo a hashi kanachikima; kanakundama, kaneza.

⁶ Mutu mweswe kanakwasa mwenyembo wenyi, nikwamba kuli mukwo ngwenyi, Hamukako!

⁷ Chilangaji kanatakamisa fuli ya oru, mukwa kusalamisa ni muhato kanatakamisa mukwa kuhata ha shiki. Ha kutwala ku milimo ya kuzuzulula ngwenyi, Yinapeme! Mba mayikolesa ni mbambo hanga yikakole.

⁸ Alioze yena, kavumbi kami Izalele, ena Yakomba, nakutongwele, mwana wa Apalahama kasendo kami,

⁹ ena nakuchijile ku masongo a hashi, nakutambikile ku mbango jisuku, nikwamba kuli yena ngwami, Uli kavumbi kami, nakutongwele, chakumbilile;

¹⁰ ngwami, Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa, kumungukuzundula ni kwoko liami lia chindume lia ululi.

¹¹ Waze eswe anakuvundukila makevwa sonyi, makatatajala; waze akulitachika ni yena makapwa amokomoko, makakuwa.

¹² Mukafupa waze alitachikile ni yena, kuchi kaawana; Waze ashile jita ni yena makapwa nichimwe.

¹³ Mumu yami Yehova Zambi ye, ngunakukwata ku kwoko lie lia chindume; yami mwene ngunambe kuli yena ngwami, Kanda wivwa woma, mungukukwasa.

¹⁴ Ena katutu Yakomba, kanda wivwa woma, enu malunga a Izalele! Yehova kanambe ngwenyi, Mungunukwasa; Mukwa-Kunukula iye mwe Musandu wa Izalele.

¹⁵ Mungunupwisa chikungo cha kuzungula nacho, chaha, cha kutwa, ni mazo; mba munukazungula milundu ni kuyifwenya, munukapwisa mindundena ngwe yizungu.

¹⁶ Munukayifuza ni fuji muyikayihehula. Kangonga makaamwanga. Mba munukawahilila muli Yehova; munukalisamba muli mwe Musandu wa Izalele.

¹⁷ Muze yiswale ni akwa kuhona mafupa meya, kaawanyine, ni malimi jo kanomu ni pwila, yami Yehova mungwakumbulula, yami Zambi ya Izalele chichi kaehuka.

¹⁸ Mungulokola njiji ha milundu ya hululu ni mafuji a meya hakachi ka yana; mungupwisa puya shima lia meya, mungupwisa chifuchi chumu mafuji a meya.

¹⁹ Mu puya mungutumba mitondo ya sedru, ni mikesha, ni miluta, ni mitondo ya olevwe. Mungusa mu kango mitondo ya kupresu, ni muzunge, ni mupinyu hamuwika,

²⁰ hanga akamone akanyingike akazewule nikusa chinyingi hamuwika ngwo, Kwoko lia Yehova halinga chino; mwe Musandu wa Izalele hachitanga.

²¹ Lumbununenu chikuma chenu, chocho kanambe Yehova. Mwanangana wa Yakomba kanambe ngwenyi, Nehenu uchela wenu.

²² Aunehe atulweze chize muchiza kupwa. Tulumbunwinenu yuma yize hiyapalika chize yapwa hanga tukayizewule, tukanyingike songo liayo. Chipwe yize muyizaho, yilumbununenu.

²³ Tulwezenu yize muyiza kwiza, hanga tukanyingike ngwetu, Nuli mazambi. Linga chipema, hanji linga chipi, hanga tukalishimwoke, hanji tukevwe mwongo.

²⁴ Kumanyi nuli amokomoko, kunwalingile nichimwe, ni yoze manutongola iye mukwa kuzelwokesa.

²⁵ Navundwile umwe ku Norte mba haneza, ni ku Chivumbuko, mba masanyika ha jina liami. Kumakaliata mianangana ngwe ndambo, ngwe tengi kakuliata uma.

²⁶ Iya wachambulwile ku uputukilo tukanyingike? Iya wachambulwile Shimbu-kanda tukambe ngwetu, Hamba kanawa? Kukwapwile niumwe wa kuchambulula, niumwe wachilumbunwine, niumwe wevwile maliji jenu.

²⁷ Yami naliangile kuchambulula ku Zaione. Ngunatumu ku Yerusaleme kanganda ka sango lipema.

²⁸ Alioze muze natala chawanyine niumwe; hakachi ko kukushi niumwe mukwa kulongesa mana, hanji yoze makumbulula muze munguhula.

²⁹ Eswe hanapu chongo chamokomoko, yilinga yo yamokomoko, tuponya two a kuzuzulula eswe fuji yamokomoko.