Izaya 40 - MUKANDA USANDU WA ZAMBI 1975

¹ Umbijeka atu jami, umbijeka, chocho kanambe Zambi yenu.

² Hanjika ku mbunge ya Yerusaleme, kololoka kuli iye, kukilikita chenyi hichahwa, uhenge wenyi hanaukonekena, hanatambula ku kwoko lia Yehova yisuho yiali ha milonga yenyi yeswe.

³ Liji limwe linatambika ngwo, Lulikenu jila ya Yehova mu puya, lulamisenu tapalo lia Zambi yetu ha kango.

⁴ Mungulunga weswe mauzundula, ni mulundu weswe ni mundundena weswe mayishikimisa; makasalamisa kuze kwapwa milindumilundu ni kweswe kwa yikulinga-yikulinga makapwisa chana.

⁵ Ni uhenya wa Yehova kumakausolola, ni musunya weswe maumona hamuwika, mumu ka nwalia Yehova hilinachambe.

⁶ Liji limwe Unambe ngwo, Kololoka! Nahula ngwami, Yika mungwamba? Musunya weswe wapwa ngwe mwambu, ni upeme wawo weswe ngwe yitemo ya mu yambu.

⁷ Mwambu wakuma, chitemo chakulela, muze mwiku wa Yehova muulambako. Pundu, atu kanapu ngwe mwambu.

⁸ Mwambu wakuma, chitemo chakulela, alioze liji lia Zambi yetu kumulikakola lia mutolo.

⁹ Ena Zaione kanganda ka sango lipema, kanduka ku mulundu usuku; ena Yerusaleme kanganda ka sango lipema, kololoka ni tachi, kololoka, kanda wivwa woma; amba ku yihunda ya Yunda ngwe Talenu Zambi yenu!

¹⁰ Mwene Yehova kaneza ni ndundo, kwoko lienyi linamukwachila chiyulo. Kwononona chenyi kaneza nacho, fweto yenyi yinamutetekela.

¹¹ Kumakalisa chendo chenyi ngwe kafunga, kumakakunga ana-mapanga mu moko jenyi, kumakaambata mu kondo, waze anamwisa ana kumakaasongwela ni vumbi.

¹² Iya wazongele kalunga-lwiji mu kwoko lienyi? Iya wafunjikile malilu ni kwoko? Iya wasele fufuta ya hashi mu njongo? Iya wapezalishile milundu yinene ha mbalansa, ni mindundena ha mbalansa yikepe?

¹³ Iya walongesele Spiritu ya Yehova? Iya walitengele chifumbe chenyi?

¹⁴ Yehova wahulile longeso kuli iya? Yoze wamulongesele jila yize ya kulita iya? Ni kumulongesa mana, ni kumulweza jila ya yinyingi?

¹⁵ Kumanyi mavungu kapwa ngwe soto limuwika mu swaha, kakwamona ngwe fufuta ha mbalansa; kakukwata matungu a mu kalunga-lwiji ngwe fufuta yafufunuka.

¹⁶ Mitondo yeswe ya Lebano kuyichi kuheta ha kunyi, chipwe yimuna jamo eswe akapwe mulambu wa kulumba.

¹⁷ Mavungu eswe kapwa amokomoko kumeso jenyi, iye kanaamono ngwenyi, Kahetele ku nichimwe, kapwa fuji yamokomoko.

¹⁸ Nyi chocho neka munutesa Zambi? Kulifwa chenyi kuchi munuchipwisa?

¹⁹ Chilangaji kakuzuzulula kaponya, fuli ya oru kakulamikaho oru, ni kuzuzulula malenge a prata a kusaho.

²⁰ Chiswale yoze kahashile kuwana mulambu upwa haha matongola mutondo kuuchi kupola; mafupa mukwa utotombo wa mana akamike kaponya umwe keshi kulisunga.

²¹ Te kunwanyingikine? Kunwevwile? Kanulumbunwinyine chize ku uputukilo? Kuchanulumbunukine chize ku kusa cha fundamentu ja hashi?

²² Iye mwene katwama helu lia kujinguluka cha hashi, mba enyaho kanapu ngwe mapasu. Iye kakuzazulula malilu ngwe hina; kakwaala ngwe mbalaka ya kutwamamo.

²³ Kakupwisa alemu ngwe amokomoko, akwa kuyula hashi kakwahwisa ngwe nichimwe.

²⁴ Machiatumba, machiakuwa mu mavu, machisoka miji, mba iye mafuza hali ayo mba malela, ni kangonga maambata ngwe yizungu.

²⁵ Mba yoze munungutesa nenyi iya hanga ngulifwe nenyi? Chocho kanahula mwe Musandu.

²⁶ Hetulenu meso jenu kwilu nukamone. Iya watangile yino yuma? Yoze wakusolola mbunga yeswe nikulita ni kwalula, nikutongola majina jo. Mumu ha unene wa ndundo jenyi ni ngolo jenyi ja tachi kashika niumwe hakachi ko wahona wakuhi.

²⁷ Enu A-Yakomba kuchi te nwakuhanjika? Enu A-Izalele kuchi te nwakwamba ngwenu, Jila yami yaswamina Yehova, Zambi kanalelesa chize chinalite ni yami?

²⁸ Te kunwanyingikine? Kunwevwile? Yehova iye Zambi ya mutolo. Mwe Tangi wa masongo a hashi. Keshi kulezumuka hanji kwivwa yikatalo. Yinyingi yenyi niumwe mahasa kuyijimbula

²⁹ Kakuhana ngolo kuli mukwa kulezumuka, kakuwezela tachi kuli yoze keshi ndundo.

³⁰ Chipwe akweze malezumuka nikwivwa yikatalo, ni akweze a tachi mahonga,

³¹ alioze waze matwaminyina Yehova kumakahuzulula tachi jo, kumakazezuka ni mapulwa ngwe pupa, kumakazomboka ni yikatalo yakuhi, kumakenda ni kulezumuka ka.