Izaya 4 - MUKANDA USANDU WA ZAMBI 1975

¹ Mapwo shimbiali makwata lunga umuwika ha tangwa lize ngwo, Mutulilisa yetwene ni kulijika yetwene. Tutayize kama Utwehe jina lie, Uchize sau lietu.

² Ha tangwa lize mutango wa Yehova muukapwa upema wa uhenya, ni mihuko ya chifuchi muyipwa uhenya wa kulisamba nawo wa waze anasala mu Izalele.

³ Yoze malisalaho mu Zaione matwama mu Yerusaleme mamutongola ngwo, Musandu, te waze eswe hanaasonekena mwono mu Yerusaleme.

⁴ Muze te Mwene hanasanyisa luchisa wa mapwo a mu Zaione ni kuchiza yipeka ya manyinga ku Yerusaleme hakachi ko ni Spiritu ya upatwilo ni Spiritu ya kwocha;

⁵ mba Yehova matanga helu lia chihela cheswe cha mulundu wa Zaione ni helu lia yikungulwila yenyi lelwa ha mwalwa, ni mwishi ni kupanguka cha kahia ka kulekwoka ha ufuku. Mumu helu lia uhenya weswe muhapwa chifuko.

⁶ Muchikapwa ha kufuka ku chivukuminya ha mwalwa, ni ha chiswamo cha kulifuka ku kangonga ni vula.