Izaya 38 - MUKANDA USANDU WA ZAMBI 1975

¹ Ha matangwa aze Hezekia wayijile, wapwile hakamwihi ni kufwa. Mba profeta Izaia mwana Amoze yeza kuli iye nikwamba ngwenyi, Yehova kanambe ngwenyi, Lulika zuwo lie, mumu kumuofwa, kuchi kumona mwono.

² Henaho aye yatalikisa meso jenyi ku yishimi nikulemba kuli Yehova ngwenyi,

³ Ngunalembe, Yehova, iwuluka kama chize hinenda kumeso je ni umwenemwene ni mbunge yingunu, nikulinga chipema kumeso je. Mba Hezekia yalila chikolo.

⁴ Mba liji lia Yehova yiliza kuli Izaia ngwenyi,

⁵ Hiluka nawa wambe kuli Hezekia ngwe, Yehova kanambe, mwe Zambi ya kalamba ke David ngwenyi, Hinevwa kulemba che, hinamona masoji je, munguweza ku matangwa je kumi lia miaka ni miaka yitano.

⁶ Kumungukupulula, ni yena ni chihunda chino, ku kwoko lia mwanangana wa Asuria; kumungukafunga chihunda chino.

⁷ Chino muchipwa chilayi cha kuli Yehova kuli yena cha kwamba ngwo, Yehova kumalinga chuma chino hamba:

⁸ Tala, munguhilwisa kunyima kumi lia shimbo Chizulie cha kusendala cha tangwa ha relojio ya Ahaze. Chocho tangwa yilihiluka kunyima kumi lia shimbo ha kusendala chalio.

⁹ Chize asonekene Hezekia mwanangana wa Yunda muze te hahinduka ku kuyiza chenyi:

¹⁰ Yingwamba ngwami, Changutamba kuya shimbu matangwa jami hakachi ni hakachi ali. Hanangukunjika ku yajilo ya Shiole kumanununa miaka yami.

¹¹ Yingwamba ngwami, Chichi kumona Yehova mu chifuchi cha amwono; chichi kumona atu hakachi ka waze atwama hashi.

¹² Zuwo liami hanalifukula ni kungutambulalio ngwe yimwe mbalaka ya kafunga. Ngwe mukwa kuseleka mahina hinavunga mwono wami; aye hanangupatula ngwe hina ha makina ya kuseleka, hakachi ka mwalwa ni ufuku kuwakungusutula.

¹³ Nakuteta angukwase ndo ni kucha cha tangwa; alioze aye ngwe ndumba kakumakwona yifwaha yami; hakachi ka mwalwa ni ufuku kuwakungusutula.

¹⁴ Ngwe chitokola hanji kapiasayingutetwoka, yingutwa mikuma ngwe katele. Meso jami yikatalo anevu ni kutala kwilu. Mwene, kanangupinjisa, pwako yena chikwashi chami.

¹⁵ Alioze yika mungwamba? Mumu iye mwene hahanjika ni yami, iye mwene hachilinga. Tulo hanguchina mumu ha kusasaminya cha mbunge yami.

¹⁶ Mwene, ha yino yuma atu kakutwama ni mwono; mu yino yuma yeswe mwatwama mwono wa Spiritu yami. Mala! N guhindwise kama, ngwehe mwono!

¹⁷ Kumanyi usasu wami wapwile wa kungukwasa. Ena hiwapulula mwono wami ku jondo ya kwonwona, mumu hiwambila milonga yami kunyima ye.

¹⁸ Shiole kuyahashile kukusakwilila; kufwa kuchahashile kukuhalisa. Waze akupalumukina ku jondo keshi kutalatala mumu ha umwenemwene we.

¹⁹ Wa mwono mwe wa mwono kakukusakwila, chize yami ngunalingi musono. Mutu kakulumbunwina mwanenyi umwenemwene we.

²⁰ Yehova mangupulula, mba mutwimba ni yisaji ya kusa matangwa eswe a mwono wetu, mu zuwo lia Yehova.

²¹ Achi Izaia te hanambe ngwenyi, Anda makuyu a kusohola akaase ha hute hanga akahinduke.

²² Chikwo nawa Hezekia te hahula ngwenyi, Chilayi chika cha kungulweza ngwo, Muoya nawa ku zuwo lia Yehova?