Izaya 37 - MUKANDA USANDU WA ZAMBI 1975

¹ Ha kuchivwa, mwanangana Hezekia yasonya mazalo jenyi, yalifuka ni chikeleyi, yanjila mu zuwo lia Yehova.

² Mba yatuma Eliakimi mukwa kuyula zuwo, ni Shepena mukwa kusonyeka, ni makulwana ja asasendote, a kulifuka ni chikeleyi, kuli profeta Izaia mwana Amoze.

³ O yamba kuli iye ngwo, Hezekia kanambe ngwenyi, Tangwa lino tangwa lia lamba, tangwa lia kutwamba, tangwa lia sau, mumu ana haheta ku ola ya kusemuka, alioze tachi jakuhi ja kwasema.

⁴ Hanji muchipwa Yehova Zambi ye mevwa maliji a Rabeshaka yoze watumiwanga kuli mwata wenyi mwanangana wa Asuria kuchoka Zambi ya mwono, hanji iye makanjisa maliji aze Yehova Zambi ye hevwa. Kashika uchilembele kama waze asala.

⁵ Chocho tuvumbi twa mwanangana Hezekia yeza kuli Izaia.

⁶ Mba Izaia yamba kuli ayo ngwenyi, Ambenu kuli mwata wenu ngwenu, Yehova kanambe ngwenyi, Kanda wivwa woma wa maliji wano wevwanga, tuvumbi twa mwanangana wa Asuria hangushililika no.

⁷ Mungusa muli iye umwe Spiritu, mba mevwa lufuma umwe akahiluke ku chifuchi chenyi mwene. Mungumushihisa ni katana mu chifuchi chenyi mwene.

⁸ Chocho Rabeshaka yahiluka, yawana mwanangana wa Asuria nikwasa jita ni Libna; mumu te hevwa ngwo, Mwanangana hakatuka ku Lakishi.

⁹ Mwanangana te hevwa ha kutwala kuli Tirhaka mwanangana wa Etiopia ngwo, Kaneza mukwasa jita ni yena. Mba ha kuchivwa yatuma tunganda kuli Hezekia ngwenyi,

¹⁰ Ambulwilenu Hezekia mwanangana wa Yunda ngwenu, Kanda utayiza Zambi ye, yoze unamufuliela, kukwonga ngwenyi, Kechi kukunjika Yerusaleme mu moko ja mwanangana wa Asuria.

¹¹ Ngwami, Hiwevwa chize mianangana ja Asuria hanalingi ku yifuchi yikwo yeswe. Hayonwona liakulu. Mba yena wika makupulula?

¹² Mazambi a mavungu te hanaapulula, waze atata hanonwona, ngwami, Ngozane, ni Harane, ni Rezefa, ni ana ja Endene waze apwile mu Telasare?

¹³ Mwanangana wa Hamate kulihi ali? Ni mianangana ja Arpade, ni chihunda cha Sefavaime, ni Hena, ni Iva?

¹⁴ Hezekia yatambula mukanda ku moko ja tunganda; yautanga. Mba Hezekia yakanduka ku zuwo lia Yehova; yauzazulula kumeso ja Yehova.

¹⁵ Mba Hezekia yalemba kuli Yehova ngwenyi,

¹⁶ Yehova-wa-Tujita, Zambi ya Izalele, kuwatwama hali akerupimi, ena uli Zambi, yena wika, wa mawanangana eswe a hashi. Uli Tangi ya mwilu ni hashi.

¹⁷ Panjika kama Yehova wivwe. Tala ni meso je, Yehova, umone. Ivwa maliji eswe a Senakeribe, wano hatuma kuchoka no mwe Zambi ya mwono.

¹⁸ Chamwenemwene Yehova, mianangana ja Asuria henyeka mavungu eswe ni yifuchi yo.

¹⁹ Hambila mazambi jo mu kahia, mumu o hi mazambi ko. O apwile a kutunga ni moko ja atu, a mitondo ni mawe, kashika haonwona.

²⁰ Kashika Yehova Zambi yetu, utulamwine yena ku moko jenyi, hanga mawanangana eswe a hashi akanyingike, yena ukawe uli Yehova.

²¹ Henaho Izaia mwana Amoze yatuma kuli Hezekia ngwenyi, Yehova Zambi ya Izalele, kanambe ngwenyi, Se hiwalemba kuli yami ha kutwala kuli Senakeribe mwanangana wa Asuria,

²² kashika liji Yehova hanambe ha kutwala kuli iye lino: Mwe mwana-pwo wa *virgem Zaione kanakulelesa; kanakusehe nikukulenya. Mwana-pwo Yerusaleme kanalengesela mutwe wenyi.

²³ Yoze hiwachoka iya? Yoze hiwashililika iya? Hiwakalumioka nikutala chikandu meso je kulimika neya? Ngwami, Kulimika ni mwe Musandu wa Izalele.

²⁴ Hiwachoka Mwene ni tunganda twe. Hiwamba ngwe, Nguneza ni chihuji cha matemba jami ndo helu lia milundu, ndo muchima lia Lebano. Mungupakula mitondo yisuku ya sedru, ni mitondo yipema ya kupresu. Munguheta ku nangamo lize lisuku liahiana, chipwe mu usaki wa minda yenyi ya chinuno.

²⁵ Hinafula mashima nikunwa meya, ni yiliato yami munguumisa njiji jeswe ka Engitu.

²⁶ Te kwevwile ngwe nachesekele kulu, ngwe nachipalile ku shakulu? Mba haliapwila hinachilinga hanga ukapwe yena mukwa kupupa yihunda ya yipanga-ya-mawe yikapwe milumba ya yiswaswa.

²⁷ Kashika enyayo apwile a tachi jikehe; alumukine akwa kukomoka, alitupiekele. Apwile ngwe mwambu wa mu musenge; ngwe tuyiputa twa wisu; ngwe mwambu uze unasoko ha fulumba; ngwe mbuto yize hiyafuwa shimbu kanda yisuha.

²⁸ Alioze ngunanyingika kutwama che, ni kutuhuka che, ni kunjila che, ni chize unanguvwila ufwatulo.

²⁹ Mumu unanguvwila ufwatulo, ni kulizata che hichanguheta mu matwi, kashika mungusa chikungo chami mu zulu lie, mungusa lelia liami mu kanwa lie, mba mungukuhilwisa kunyima mu jila yize yene wejilile.

³⁰ Chino muchipwa chilayi kuli yena. Mwakono munulia chize chalisokela; ha mwaka wamuchiali munulia chize chinasoko ku mbuto yacho; mba ha mwaka wamuchitatu munulima, munucha, munutumba minda ya uva ni kulia mihuko yayo.

³¹ Mba waze asala a ku munyachi wa Yunda, waze hapuluka, kumakasokesa miji kushi ni kwima mihuko kwilu.

³² Mumu ku Yerusaleme kumukutuhuka atu a piliwiji, ku mulundu wa Zaione kumukukatuka waze hapuluka. Tachi ya Yehova-wa-Tujita mujilinga chino chuma.

³³ Kashika Yehova kanambe ha kutwala kuli mwanangana wa Asuria ngwenyi, Kechi kanjila mu chihunda chino; kechi kakongamo mwivu; kechi kanjilamo ni lukepwe, chipwe kulumbikako mulumba wa kulimika nacho.

³⁴ Jila yize wejilile yenayo mahilukila nawa. Kechi kanjila mu chihunda chino. Chocho kanambe Yehova.

³⁵ Mumu yami kumungukafunga chihunda chino nguchilamwine ha mukunda wa yami mwene, ni wa kavumbi kami David.

³⁶ Mba mungelo wa Yehova yatuhuka, yalamba mu chilombo cha A-Asuria kulakaji lia tununu ni makumi nake a tununu ni tununu atano. Muze akwo halaula chimenemene kumanyi eswe apwile afu.

³⁷ Chocho Senakeribe mwanangana wa Asuria yakatuka, yahiluka ku Ninive, yatwamako.

³⁸ Mba kulutwe shimbu machiwayila mu zuwo lia zambi yenyi Nishoroko, ana jenyi Adramaleke ni Sharezere yamushiha ni katana. O yachinyina ku chifuchi cha Ararate, mba mwanenyi Ezare-Hadone yamuswana mu wanangana.