Izaya 36 - MUKANDA USANDU WA ZAMBI 1975

¹ Ha mwaka kumi ni wamuchiwana wa mwanangana Hezekia, Senakeribe mwanangana wa Asuria yeza kulimika ni yihunda yeswe ya yipanga mu Yunda; yayitambula.

² Mwanangana wa Asuria ku Lakishi yatuma Rabeshaka kuli mwanangana Hezekia mu Yerusaleme, ni tujita anji. Yamanyina ku kapila wa Chitende cha ku tunda, ha tapalo lia ku munda wa mukwa kutomesa mahina.

³ Kwatuhukile kuli iye Eliakimi mwana Hilekia, mukwa kuyula zuwo, ni Shepena mukwa kusonyeka, ni Joa mwana Asafwe mukwa kusoneka sango.

⁴ Rabeshaka yamba kuli ayo ngwenyi, Ambulwilenu Hezekia ngwenu, Mwanangana munene, mwanangana wa Asuria kanambe ngwenyi, Ufulielo uno unajikijila kuchi wapwa?

⁵ Unamono ngwe maliji amokomoko mapwa malinjekela ni tachi ja jita? Iya unajikijila ukangukatukile yami?

⁶ Unajikijila hali A-Engitu, mulumbu wa lumbungu wa kumakuna. Nyi mutu majikijilaho muumutuwa kwoko. Falau mwanangana wa Engitu chocho apwa kuli waze eswe mamujikijila.

⁷ Alioze nyi munwamba kuli yami ngwenu, Tunajikijila hali Yehova Zambi yetu, ngwami, Mwenawo Hezekia hachiza manangamo jenyi ni yilumbilo yenyi, mba hamba kuli A-Yunda ni A-Yerusaleme ngwenyi, Chanutamba kuwayila ku chilumbilo chino.

⁸ Kashika hanenu yifungo kuli mwata wami mwe mwanangana wa Asuria, mba yami mungunwaha tununu aali a tuvwalu nyi yenu munuhasa kusaho akwa kwaendesa.

⁹ Ngwe kuchi munuhasa kukumba kapitau umuwika mulelu hakachi ka ngamba ja mwata wami shimbu nunafuliela A-Engitu anwehe matemba ni akwa tuvwalu?

¹⁰ Te chejile ni Yehova kulimika ni chifuchi chino ni kuchonwona? Yehova hangwamba ngwenyi, Yako ulimike ni chifuchi chino uchonwone.

¹¹ Henaho Eliakimi ni Shepena ni Joa yamba kuli Rabeshaka ngwo, Hanjikenu kama kuli yetu tuvumbi twenu mu limi lia A-Asuria se liatulumbunuka. Kanda nuhanjika mu limi lia A-Yunda, mwe mu matwi ja atu ali ha chipanga-cha-mawe.

¹² Alioze Rabeshaka yamba ngwenyi, Te mwata wami hangutuma kuhanjika maliji ano kuli yenu ni mwata wenu? Te kangutumine kuli malunga wano atwama ha chipanga-cha-mawe, se o nawa hamuwika ni yenu hanafunjikacho kulia tuji jo ni kunwa masuso jo nyi?

¹³ Mba Rabeshaka yamana nikukololoka ni liji linene mu limi lia A-Yunda ngwenyi, Ivwenu liji lia mwanangana munene, mwanangana wa Asuria!

¹⁴ Mwanangana kanambe ngwenyi, Kanda nutayiza Hezekia kunwonga, mumu kechi kuhasa kunupulula.

¹⁵ Kanda nutayiza Hezekia ha kwamba ngwenyi, Fulielenu Yehova, Yehova matupulula; mba chihunda chino kechi kuchihana kuli mwanangana wa Asuria.

¹⁶ Kanda nupanjika kuli Hezekia mumu mwanangana wa Asuria kanambe ngwenyi, Litesenu ni yami nutuhuke kuli yami; mba munulia mutu mweswe ku mutondo wenyi wa uva, ni mutondo wenyi wa makuyu, ni mweswe manwa ku meya a mu shima lienyi:

¹⁷ ndo mungwiza kunutwala ku chifuchi chimwe chalifwa ni chifuchi chenu—chifuchi cha mbuto ni vinyu, chifuchi cha mbolo ni minda ya uva.

¹⁸ Kanyamenu, Hezekia kanda anwonga ha kwamba ngwenyi, Yehova matupulula. Te umwe zambi wa mavungu hapulula atu jenyi ku kwoko lia mwanangana wa Asuria?

¹⁹ Mazambi a Hamate ni Arpade kulihi ali? Mazambi a Sefavaime kulihi ali? Hapulula Samaria ku kwoko liami nyi?

²⁰ Zambi muka hakachi ka mazambi a yifuchi yeswe hapulula chifuchi chenyi ku kwoko liami, mba nunyonge ngwenu, Yehova mapulula Yerusaleme ku kwoko lienyi?

²¹ Alioze atu aholele kúlú. Kakumbulwile liji nilimwe. Mumu mwanangana hahana shimbi ngwenyi, Kanda numukumbulula.

²² Henaho Eliakimi mwana Hilekia mukwa kuyula zuwo, ni Shepena mukwa kusonyeka, ni Joa mwana Asafwe mukwa kusoneka sango, yeza kuli Hezekia ni mazalo jo a kusonya. Yamwambulwila maliji a Rabeshaka.