Izaya 35 - MUKANDA USANDU WA ZAMBI 1975

¹ Puya ni chifuchi chumu muyikawaha; kango muyikawahilila nikutemuna yitemo ngwe kawalangaza.

² Kumuyikatemuna nikulumbama nikuwahilila ni chiseke ni kwimba. Mahanako uhenya wa Lebano, ni ulamba wa Karmela ni Sharone. Kumakamona uhenya wa Yehova ni ulamba wa Zambi yetu.

³ Takamisenu moko a upekepeke, kolesenu makungunwa aze keshi tachi.

⁴ Ambenu kuli akwa mbunge ja woma ngwenu, Takamenu! Kanda nwivwa woma! Talenu Zambi yenu meza ni kufwetesa, meza ni kwononona cha Zambi. Meza nikunulamwina.

⁵ Henaho meso ja tupuputa malaula, matwi ja afwa-matwi majikuka.

⁶ Henaho chilema masamba ngwe kapaji, ni limi lia kamama mulikemba mumu ha uwahililo. Mumu meya mapukukila mu puya, ni yitwetwe mu kango.

⁷ Masekeseke a kahia malumuka Chitende, ni mavu a pwila malumuka mafuji a meya. Wendelo wa mikuza kuze apwile nikupomba muupwa wa mwambu ni mbungu ni manenga.

⁸ Kumukukapwa tapalo, jina lialio Tapalo Lisandu. Akwa luchisa kechi kapalikako ni akwa kupalikako kechi kapiasuka, chipwe mapwa yihepuke.

⁹ Ndumba kechi kapwako; chipwe ngongo mukwa kupapulula kechi kakandukako. O kechi kaawanako alioze kule mendelamo.

¹⁰ Kule ja Yehova makahiluka nikwiza ku Zaione nikwimba, ni uwahililo wa mutolo ha mitwe yo. Kumakawana uwahililo ni chiseke; mba chinyengo ni mikuma muyikachina.