Izaya 34 - MUKANDA USANDU WA ZAMBI 1975

¹ Enu, mavungu, kundamenu nwivwe, enu minyachi, panjikenu! Hashi kakevwe, ni waze eswe akuzalisaho, ni muno-muze ni yuma yeswe yakusemukamo.

² Mumu Yehova kanatenuka ni mavungu eswe, ufwatulo ali nawo ni tujita two eswe. Hanaahisa ni kwakunjika ku kushiha.

³ Waze makaashiha hakachi ko makaumbila, ni vumba lia afu jo mulikakupukako; ni milundu muyikapukuka ni manyinga jo.

⁴ Mbunga ya mwilu muyikapola, ni malilu maavunga ngwe mukanda wa chivungo. Wunji wo muukaholoka ngwe mafwo akuholoka ku mutondo wa uva, ngwe mafwo akuholoka ku mukuyu.

⁵ Mumu katana kami hanwa kanawa mwilu, mba kaneza kusopa ni Endome ni atu aze hinaahisa.

⁶ Yehova kali ni katana, hakuta ni manyinga, halia nawa maji, hamwe ni manyinga a ana-mapanga ni pembe, ni maji a ku njiso ja kuji a mapanga. Mumu Yehova kali ni yitapo mu Mbozera, kushiha chinene mu chifuchi cha Endome.

⁷ Mbau malimbuka hamwe no, ni yimbembe hamwe ni kuji a ndundo. Chifuchi cho muchipwa cha pwocha ni manyinga, mavu jacho mapwa ni chinuno cha maji.

⁸ Mumu Yehova kali ni tangwa lia kukala milonga, mwaka wa kufwetesa ha chikuma cha Zaione.

⁹ Yitwetwe ya Endome muyalumuka usososhi, ni mavu jenyi mapwa fundanga. Chifuchi muchipwa usososhi wa kahia.

¹⁰ Ufuku ni mwalwa kuchichi kajima; mwishi wacho muufwinda miaka yeswe. Chize ku chisemuko ndo ku chisemuko muchitwama ngwe puya; niumwe mapalikamo ku miaka ya mutolo.

¹¹ Alioze toji ni chisekele machizuka; chikungulu ni chikwakwalo matungamo. Kumakachifunjika ni muhipu wa kutatajala; alemu jacho maeseka ni prumo ya ulumbuke.

¹² Makasanyika alemu jacho ku wanangana alioze niumwe masolokako. Mianangana jenyi eswe mapwa amokomoko.

¹³ Mingonga muyikasoka ha mbonge jacho, ni mazo-a-lunoka ni mikalale ku mbonge jacho ja kukolesa. Kumuchikapwa wendelo wa mikuza ni zuwo lia yikungulu.

¹⁴ Ngongo matakana ni yimbungu, ni mahamba a mu yambu malisanyikako, ni mwe mujimu wa ha ufuku kwenako mapwila, nikuwana uhwimino.

¹⁵ Kwenako chikungulu matunga chaswa ni kumba monda, ni kutota ana ni kwakunga mu Chizulie chenyi. Ewa, kwenako hula-yula makunguluka a ndemba ni chali, ndemba ni chali.

¹⁶ Fupenu nukatange mu mukanda wa Yehova; niumwe hakachi ka wano mahona, niumwe chihwo mahona kuji yenyi. Mumu kanwa lia Yehova hiliachituma ni Spiritu yenyi hanaakongo.

¹⁷ Hanaatela chela, kwoko lienyi hilinachipangila kuli ayo ni muhipu, makachihinga ndo ku miaka yeswe, chize ku chisemuko ndo ku chisemuko makatwamamo.