Izaya 33 - MUKANDA USANDU WA ZAMBI 1975

¹ Lamba kuli yena chonwonyi, yena mwene kakwonwene; ena mukwa mafwefwe, niumwe halinga ni mafwefwe kuli yena. Muze mulitwamina kwonwona, mba akwo makwonwona; muze mulitwamina kulinga ni mafwefwe, akwo malinga ni mafwefwe kuli yena.

² Yehova, utulinge vumbi; tunakutwaminyina. Upwe kwoko kuli yetu tangwa ha tangwa ha chimenemene, upwe ulamwino wetu ha tangwa lia lamba.

³ Ha kwivwa zungo lia kukulunguza mavungu machina, ha kukatuka yena, atu mamwangana.

⁴ Maswila kupunda upite ngwe mayungu, matumbukilako ngwe makumbi.

⁵ Yehova kanangama mumu katwama mwilu; kumakazalisa Zaione ni kulita ni ululi.

⁶ Kumakaholesa miaka yenu, ni kulumbama cha ulamwino, ni mana, ni chinyingi; mba woma wa Yehova muupwa upite wenyi.

⁷ Akwa hamu kanalili haze; mikeji a sambukila kanalili mbimbi.

⁸ Matapalo hanaahichika a mbozo; akwa kwendelamo keshiko. Usendo kakuutangula, yela kakwalelesa, kapalile atu.

⁹ Chifuchi chinalili ni kuhonga; Lebano kuyinatatajala ni kulela; Sharone yapwa ngwe puya, ni Mbashane ni Karmela kanalakumuna mafwo jo.

¹⁰ Yehova kanambe ngwenyi, Haliapwila mungukatuka, mungulizundula, mangunangamisa.

¹¹ Nwakwaka yizungu, nwakusema mwambu; mwiku wenu unapu kahia ka kunulalisa.

¹² Atu mapwa ngwe hawema mu kale; ngwe mikalale ya kuteta muze mayocha mu kahia.

¹³ Enu nuli kusuku, panjikenu chize hinalinga; enu nuli hakamwihi, tayizenu tachi jami.

¹⁴ Woma hiweza hali yivulumunyi mu Zaione; yitanganyanyi kanachikima. Iya hakachi ketu mahasa kutwama ni kahia ka kulalisa? Iya hakachi ketu mahasa kutwama ni mbwemena ya miaka yeswe?

¹⁵ Yoze kakwenda ni ululi nikuhanjika chize chinate; yoze kakulelesa upite uze unakatuka ku kupinjisa akwo, kakusakumuna moko jenyi kuchina makwata ku chijiko, kakujika matwi jenyi kuchina mevwa yuma ya kumwanga manyinga, kakutuka meso jenyi kuchina mamona uhenge.

¹⁶ Makatwama kwilu, kuma kwenyi kwa kulitunga mukukapwa mu mbonge ja yimawe. Mbolo yenyi mamwahayo, meya jenyi kechi kahona.

¹⁷ Meso je makamona mwanangana mu upeme wenyi; makamona chifuchi chize chinayi nikutoha kusuku.

¹⁸ Mbunge ye muyikazewula ha we mwongo ngwe, Mukwa kwalula kuli ali? Mukwa kupezalisa lijimu kuli ali? Mukwa kwalula tuposhi kuli ali?

¹⁹ Akwa shino kunuchi kaamona nawa, akwa limi likalu kulianulumbunukine, te limi lia kukukuma kunwalivwile.

²⁰ Tala ku Zaione chihunda cha yiwanyino ya kufunjika! Meso je makamona Yerusaleme, chihunda cha kuhwima, mbalaka kuyichi katutuluka, mbambo jayo kechi kajizula nilimwe tangwa, ni mihipu yayo kuyichi kapatuka.

²¹ Kwenako Yehova mapwa ha sali lia yetu ni uhenya wenyi kuma kwa njiji jinene ni yitwetwe yinene, kuze mato-a-jita ni yilapo yo kuyichi kahasa kuya, chipwe ulungu unene kuuchi kapalika.

²² Mumu Yehova iye ngaji yetu, Yehova iye mukwa kutuyula; Yehova iye mwanangana wetu, makatulamwina.

²³ Mihipu yenu yinakokoloka; kuyahashile kukolesa mutondo wa wato kuma kwawo, chipwe kuzazulula mwe lona. Henaho atu a kupupa malipangilo hamwe ni upite wa jita; chipwe yitonji makwata upite.

²⁴ Niumwe watungako mamba ngwenyi, Ngunayiji. Waze atungako maakonekena uhenge wo.