Izaya 32 - MUKANDA USANDU WA ZAMBI 1975

¹ Umwe mwanangana makayula ni ululi; ni alemu makayula nikulita.

² Mba umwe mutu makapwa ngwe chiswamo ha fuji, ngwe uchinyino ha kangonga, makapwa ngwe tupila twa meya muma mumu, ngwe Chizulie cha luliwe lunene mu chifuchi cha yikatalo.

³ Mba meso ja akwa kumona kechi kaajika, ni matwi ja akwa kwivwa makapalika.

⁴ Mitwe ya akwa kulipupula muyikapwa ni upatwilo upema, ni malimi a yikukumi makahanjika ndusu nikupatula.

⁵ Kechi katongola chihepuke nawa ngwo, Mulemu, chipwe chikanyame kechi kamutongola ngwo, Wa ndama.

⁶ Mumu chihepuke kakuhanjika uhepuke, ni mutwe wenyi wakutaka uhenge, akalinge utanganyanyi, akahanjike uhenge ha kutwala kuli Yehova, akahichike akwa zala ni zala yo, akachize kunwa cho kuli akwa pwila.

⁷ Ukanyame wa chikanyame upi, kakutaka yuma ya ungulungulu akalumbule yiswale ni maliji a mahuza, chipwe chikuma cha mukwa kuhona chinate.

⁸ Alioze mutu wa mbunge yipema kakunyonga yuma yipema, ni ku yuma yipema kanajikijila.

⁹ Katukenu enu mapwo nunahwimi, nwivwe liji liami; enu ana ja mapwo kunushi woma, panjikenu chize ngunambe.

¹⁰ Kuhiana mwaka hakehe munupwa ni lwaji, enu mapwo kunushi woma; mumu miuva kuyichi kwima ni kucha cha mihuko kuchichi kwiza.

¹¹ Chikimenu, enu mapwo nunahwimi, pwenu ni lwaji, enu kunushi woma; Zulenu, lifukulenu nukazale chikeleyi mu zalilo jenu.

¹² Lilambenu ha mapambo nikulishimwoka mumu ha minda yipema, ni ha mutondo wa kwima uva,

¹³ ha mavu ja atu jami aze anasokesa mingonga ni mikalale; ewa, ni ha mazuwo a uwahililo mu chihunda cha uwahililo.

¹⁴ Mumu zuwo lia mwanangana maliehuka; chihunda cha atu anji machichina; mulundu ni kaposhi wa kalayi muyalumuka mena a tushitu ndo ku miaka, uwahililo wa yimbulu a mu yambu, ni ulilo wa yimuna.

¹⁵ Ndo mwilu matuzukwila Spiritu ni puya muyalumuka munda wa chinuno, ni munda wa chinuno maumona ngwe usaki.

¹⁶ Mba kulita muchitwama mu puya; ni ululi muutwama mu munda wa chinuno.

¹⁷ Songo lia ululi mulipwa uhwimino, ni ku-ululi mukwiza kuhwima ni kufuliela ndo ku miaka yeswe.

¹⁸ Atu jami makatwama muma mwa sambukila, mu mazuwo keshi woma, mu yihela ya kuhwima ni kuhola.

¹⁹ Usaki maununguna mbiu, chihunda machipuzula.

²⁰ Kawaha waze akukuwa mbuto ku meya eswo, waze kakutaviza molu ja ngombe ni chimbulu kwenda kweswako.