Izaya 31 - MUKANDA USANDU WA ZAMBI 1975

¹ Lamba kuli waze akupalumuka ku Engitu kufupa yikwashi. Waze akujikijila hali tuvwalu, kakufuliela matemba-a-jita mumu ha kupwa anji, kakufuliela akwa tuvwalu ha kupwa ni tachi jinji. Alioze katalile kuli mwe Musandu wa Izalele; kahulile Yehova.

² Hindu iye kali ni mana, kakuneha kwonwona; keshi kuhilwisa maliji jenyi. Kumakakatukila munyachi wa akwa kulinga yipi kulimika ni waze akukwasa akwa uhenge.

³ A-Engitu o atu, hi Zambi ko. Tuvwalu two a musunya, hi Spiritu ko. Muze Yehova molola kwoko lienyi, chikwashi matalinga, ni yoze amukwashile malimbuka, mba kumakanonga eswe hamuwika.

⁴ Mumu chocho Yehova hanambe kuli yami ngwenyi, Ngwe ndumba, hanji mwevu wa ndumba, makenana ha yifwo akwata, chipwe masanyika mbunga ya tufunga akalimike nenyi iye kechi kwivwa woma ha kukalumuka cho, kechi kusetuka ha zungo lio, chocho nawa Yehova-wa-Tujita makahulumuka nikwasa jita ha mulundu wa Zaione ni ha mundundena wako.

⁵ Ngwe tujila muze mamekena chocho Yehova-wa-Tujita makafunga Yerusaleme. Kumakayifunga, kumakayipulula, kumakayivwila keke ni kuyilamwina.

⁶ Hilukenu nawa kuli yoze nwakolemene chikolo, enu atu ja Izalele.

⁷ Mumu ha tangwa lize mutu mweswe makambila tuponya twenyi a prata ni tuponya twenyi a oru waze moko jenu hanulingila ni shili.

⁸ Mwe Ka-Asuria mafwa ni katana alioze hi wa mutu ko; katana umwe hi wa mutu ko makanwonwona. Kumakachina katana, alioze akweze jenyi maatenga ngamba.

⁹ Luliwe lwenyi mulukajimuka ni mwongo, ni tupitau twenyi makehuka mbandeira ni woma. Chocho kanambe Yehova, yoze uli ni kahia kenyi mu Zaione, yoze uli ni lutengo wenyi mu Yerusaleme.