Izaya 30 - MUKANDA USANDU WA ZAMBI 1975

¹ Yehova kanambe ngwenyi, Lamba kuli e ana a uhulia, waze akulinga nikulita ni kuhala, alioze hi kuhala cha yami ko. Kakukolesa usendo alioze hi wa Spiritu yami ko hanga akaweze mulonga ha mulonga.

² Kakukatuka akaye ku Engitu kuswamina ku tachi ja Falau, ni kuchinyina ku Chizulie cha Engitu, alioze kanguhulile yami ngukaasongwele.

³ Kashika tachi ja kunufunga ja Falau mujalumuka sonyi jenu, kuchinyina ku Chizulie cha Engitu muchiza kunulelesa.

⁴ Mumu chipwe akwa kuyula jenyi ali ku Zoane ni mikeji jenyi kakuheta ku Hanesha,

⁵ eswe kakwivwa sonyi kuli atu aze hahashile kwakwasa, kaanehenene kukwasa hanji kufumbuka, alioze sonyi ni kusauka.

⁶ Liji lia kutwala kuli ngongo ja ku Negeve. Ndusu mu chifuchi cha lamba ni kupinda, kuze kwakatuka ndumba a chihwo ni kuji, ni yenge ni toto, kakumbata upite wo ha manyima ja yimbulu, ni yikumba yo ya ndando ha kunda ja tumelu, kuli atu aze kechi kuhasa kwakwasa.

⁷ Mumu kukwasa cha Engitu chamokomoko, kuchalumbunukine. Kashika hinamuluka jina ngwami, Rahape yoze unatwama chizechene.

⁸ Kashika yako uchisoneke ha chilolwa kumeso jo, uchisoneke mu mukanda, hanga ha miaka ya kwizaho chikapwe uchela ha miaka yeswe.

⁹ Mumu o kapwa vungu lia uhulia, ana ja mahuza, ana aze kechi kwivwa kufumba cha Yehova.

¹⁰ Kuli akwa kumona kakwamba ngwo, Kanda numona! Ni kuli aprofeta kakwamba ngwo, Kanda nuprofeteza kuli yetu chize Chinapeme. Hanjikenu kuli yetu yuma ya kupepieka, profetezenu yuma ya kulitambila.

¹¹ Hichikenu ye jila, hambulukenu mu chikoka; kanda twivwa nawa ha kutwala kuli mwe Musandu wa Izalele.

¹² Kashika mwe Musandu wa Izalele kanambe ngwenyi, Se nwakulelesa liji lino, nunajikijila kupinjisa ni kupiya, ni kulikolelaho;

¹³ kashika uhenge uno muukapwa kuli yenu ngwe mwaji ha chipanga-cha-mawe chisuku, chinakuluka, chinambe kupuzuka, kulundumuka chacho muchipwa cha susumuku ha kashimbu kaze kene;

¹⁴ kupulika chacho muchipwa ngwe ndeho ya uma yize mapalwola ni uswi. Hakachi ka yipalupalu yayo chipwe chiyo kechi kuchiwana, chize mambachilaho kahia ka ha jiko, chipwe kuswita nacho meya ku shima.

¹⁵ Mumu Mwene Yehova, mwe Musandu wa Izalele, kanambe ngwenyi, Ha kuhiluka ni kuhwima, munukalilamwina; mu uhwimino ni Ufulielo mukukapwa tachi jenu. Alioze kunwatayile.

¹⁶ Nwambile ngwenu, Hi chocho ko! Mututambwisa tuvwalu twetu. Kashika munukatambuka kukatukako. Nwambile ngwenu, Mutwenda ha tuvwalu a tambu. Kashika akwa kunuhanga makapwa ni tambu.

¹⁷ Kanunu makachina ha kwomisa cha mutu umuwika. Ha kwomisa cha atano munuchina ndo munukapwa ngwe mutondo wa mbandeira helu lia mulundu, ngwe chilayi ha mundundena.

¹⁸ Kashika Yehova kanashimbula akanulinge vumbi; kashika kanalinangamisa ha kunuvwila keke. Mumu Yehova iye Zambi ya ululi, kawaha waze mamutwaminyina.

¹⁹ Ewa, enu atu a mu Zaione, nwatwama mu Yerusaleme; kunuchi kulila nawa. Kumakapwa ni vumbi kuli yenu ha kwivwa muteto wenu. Muze mevwa manukumbulula.

²⁰ Chipwe Mwene manulisa mbolo ya lamba ni meya a luyinda, hindu Longeshi yenu kechi kanuswamina nawa, alioze meso jenu mamona Longeshi yenu.

²¹ Muze munukondoloka hanji ku chindume, hanji ku chimeso, matwi jenu nawa mevwa liji kunyima yenu lia kwamba ngwo, Ye jila, yino; endelemo.

²² Henaho munukachisa tuponya twenu a kwola ni kufuka ni prata, ni tuponya twenu a kuzuzulula ni kufuka ni oru. Munukaamwanga ngwe chuma cha luchisa, nikwamba ngwenu, Katukenuko!

²³ Iye kumakanwaha vula ha mbuto yize munukakuwa hashi, ni mbuto yize muyima ku mavu, mba muyipwa yipema ya kulumbama. Ha tangwa lize nawa yimuna jenu makalia ku ulilo unene.

²⁴ Ni ngombe ni yimbulu aze akulima hashi malia yuma ya kulungiwa ni mungwa, te mwambu wa kuumisa ni pá ni chifujilo.

²⁵ Chikwo nawa ha mulundu weswe usuku ni ha mundundena weswe usuku kumuhakapalika yitwetwe ya tò ni meya, ha tangwa lia kushiha chinene muze tuposhi makanungukina hashi.

²⁶ Chikwo nawa pangu lia kakweji mulikapwa ngwe pangu lia tangwa, ni pangu lia tangwa mulikaliwezela tachi yisuho shimbiali, ngwe pangu lia matangwa shimbiali ha tangwa lize Yehova majichika chilonda cha atu jenyi ni kuwuka mbandu jize iye waatwile ni kwoko lienyi.

²⁷ Jina lia Yehova Unakatuka kusuku nikuyila ni kahia ka utenu wenyi ni mwishi ulá pwi unafwinjiko. Mivumbo yenyi yinazala ni ufwatulo, limi lienyi linapu ngwe kahia ka kulalisa.

²⁸ Mwiku wenyi unapu ngwe muhwiji wa kuzemuna wa kuheta ndo ku kota. Kumakasalula mavungu ni musalo wa kwonwona, kumakasa mu kanwa lia mavungu lelia lia kwapiangula.

²⁹ Kumunukapwa ni mwaso ngwe wa ha Ufuku muze munupwa ni chiwanyino chisandu. Munukapwa ni chiseke cha mbunge ngwe umwe kanakatuka ni liji lia lundembo akaye ku mulundu wa Yehova, kuli Luliwe lwa Izalele.

³⁰ Mba Yehova makavwisa atu liji lienyi lia mwanangana. Makamona kwoko lienyi nikuhulumuka nikwalamba ni utenu wa kulekwoka, ni mulengi wa kahia ka kulalisa, ni vula munji chikolo, ni kangonga, ni chiwe.

³¹ A-Asuria makevwa mwongo ha kwivwa liji lia Yehova muze makalamba ni mbwechi yenyi.

³² Ha kwalamba Yehova ni mbwechi yenyi ya kwafwetesa wapuwapu, muchipwa ni mwaso wa tumikupiela ni tulialia, shimbu iye masa no jita ni kwoko lienyi lia kuzundula.

³³ Mumu jiko hanalilulika kulu, hali mwe mwanangana hanalilulika; mulumba wacho kutoha ni kusuha ni kahia ni kunyi ja kulumbama. Mba mwiku wa Yehova muuliwika ngwe muhwiji wa fundanga.