Izaya 3 - MUKANDA USANDU WA ZAMBI 1975

¹ Mumu Mwene Yehova-wa-Tujita kanachiza kuli A-Yerusaleme ni A-Yunda ni pango ni mulumbu, ujikijilo weswe wa mbolo, ni ujikijilo weswe wa meya;

² ni mukwa ndundo, ni kajita, ni ngaji, ni profeta, ni tahi, ni mukulwana,

³ ni kapitau wa makumi atano, ni mutu mulemu, ni kaliamanga, ni mukwa tufutafuta wa mana, ni mukwa kujama ni umbanda.

⁴ Mungutenga ana-malunga alemu jo, ni ana-akemba maayula.

⁵ Atu malipinjisa umwe ni mukwo ni mukwo, mutu mweswe mapinjisa mulio, mutu mweswe mwenyembo wenyi; kanuke masaula mukulwana, ni wamokomoko mapinjisa mulemu.

⁶ Muze mutu makwata yayo mu zuwo lia tato ngwenyi, Yena uli ni uzalo, kashika yena muopwa kasongo ketu, mulumba uno wa yiswaswa muupwa wanangana we;

⁷ ha tangwa lize mamba ngwenyi, Chichi kupwa mbuki, yami; mumu mu zuwo liami kumushi mbolo hanji uzalo, kuchi kungupwisa kasongo ka atu.

⁸ Mumu A-Yerusaleme hanatalinga, A-Yunda hanalimbuka; mumu kuhanjika cho ni yitanga yo yapwa ya kulimika ni Yehova, ni kumwihia kwe kumeso ja uhenya wenyi.

⁹ Katonde ko kukanaashindakenya; ene kakusolola shili yo ngwe Sondome, kayiswekele. Lamba lio! Mumu ene hanalikokela chipi.

¹⁰ Ambulwila akwa ululi ngwe, Muchipwa kawape no, mumu makalia mihuko ya yitanga yo.

¹¹ Lamba kuli yingulungulu! Muchipwa chipi kuli ayo, mumu mamulinga chize iye halinga.

¹² Atu jami—ana amokomoko kakwapinjisa, ni mapwo kakwayula. Atu jami, tusongo twenu kananwongo, ni kulumbangenya majila jenu.

¹³ Yehova heza kuma kwenyi akasope, hamana akapatwile atu jenyi.

¹⁴ Yehova kanaputuka kusopa ni makulwana ni alemu ja atu jenyi ngwenyi, Yenu hinwalia we munda wa uva, upite wa kupupa kuli yiswale uli mu mazuwo jenu.

¹⁵ Kuchi chinalumbunuka chize nunafwenye atu jami, ni kucheka meso ja yiswale? Chocho kanambe Mwene Yehova-wa-Tujita.

¹⁶ Yehova wambile ngwenyi, Mumu mapwo a mu Zaione kanalizate nikwenda nikuzolola mikonga yo, nikutala ni kachikulula ku meso jo, nikuchichangila ha kwenda cho, ni ku molu jo kunjatangila,

¹⁷ kashika Mwene makalamba mitwe ya mapwo a mu Zaione ni yilonda, Yehova makaafukula lume.

¹⁸ Ha tangwa lize Mwene makachiza uhenya wa yijingo, ni yipangula, ni malenge a ha makota,

¹⁹ ni yingelengele, ni makai, ni malesu,

²⁰ ni chapeu, ni yijingo ya ku moko, ni miya, ni milangi ya perfumo, ni tumbinga,

²¹ ni tuzeya a ha minwe ni a mu mazulu,

²² ni mazalo a yiwanyino, ni a lupula, ni a ngungu, ni ngonga,

²³ ni mazalo a wanda, ni a linyu, ni matepa, ni manda.

²⁴ Ha perfumo masalakanyisa kufutama; ha muya wa ponda masalakanyisa lumuhipu; ha kambu ja kuyinda masalakanyisa lwole; mazala chikeleyi, hi hina lia pichi ko; ha uchenge manwaha sonyi.

²⁵ Malunga jenu mafwa ni katana, akwa ndundo jenu mafwa mu jita.

²⁶ Yajilo yako muyilila ni kulishimwoka; matwama hashi mumu hamupupa.