Izaya 29 - MUKANDA USANDU WA ZAMBI 1975

¹ Ariele! Ariele! Lamba lie! Chihunda kuze David Watwamine. Weza mwaka ha mwaka; yiwanyino yikapwe ha miaka yayo.

² Hindu mungupinjisa Ariele, mba kumukukapwa mikuma ni kulinyenga, neye kumakapwa kuli yami ngwe umwe Ariele.

³ Mungusa yilombo yami kweswe kwa kukujingilika, mungukuseleka ni tuposhi; mungutunga milumba ya kuseleka.

⁴ Mba he hashi mukahanjika, mwe mushi mu fufuta maliji jenu makatuka. Liji lie mulikakatuka mu mavu ngwe liji lia mujimu, liji lie mulikalinongota mu fufuta.

⁵ Alioze mbunga ya akwa kole je mapwa ngwe fufuta yikepekepe, ni mbunga ya yiswi ngwe yizungu ya kuhehuka. Cha kutungumuna, susumuku

⁶ Yehova-wa-Tujita meza kuli yena ni kukulunguza, ni munyiko, ni Chizungozungo, ni chijimbi, ni kangonga, ni mulengi wa kahia ka kulalisa.

⁷ Mba mbunga ya mavungu eswe a kwasa jita ni Ariele, waze akulwa nenyi, ni mbonge yenyi, ni kumupinjisa, mapwa ngwe chilota, ngwe usolwelo wa ufuku.

⁸ Ngwe mukwa zala malota kulia, mba malaula alioze zala yenyi kuyatepulukile, hanji mukwa pwila malota kunwa mba malaula ni kulezumuka, pwila kuyahwile, chocho mbunga ya mavungu eswe muyipwa waze anase jita ni mulundu wa Zaione.

⁹ Komokenu nulishimwoke, jikenu ku meso nupupute! Zengewenu alioze hi ni vinyu ko, piepietenu alioze hi ni kunwa chisasu ko.

¹⁰ Mumu Yehova hanazukula hali yenu Spiritu ya kuya tulo anji. Hanajiki meso jenu, ngwami, aprofeta, hanafuku mitwe yenu, ngwami, akwa kumona.

¹¹ Usolwelo wa yuma yino yeswe hiwapwa kuli yenu ngwe maliji a mukanda umwe hanaujiki. Muze mauhana kuli umwe mukwa kutanga ngwo, Tanga, aye mamba ngwenyi, Chahashile mumu wa kujika.

¹² Mba muze mauhana kuli mukwo yoze kanyingikine kutanga ngwo, Tanga, aye mamba ngwenvi, Chanyingikine kutanga.

¹³ Mwene wambile ngwenyi, Wano atu kanakundama kuli yami ni makanwa jo ni kungulemesa ni mivumbo yo, alioze mbunge jo kusuku jili ni yami, ni woma akunguvwila wapwa shimbi yimwe ya atu lianalilongesa kupalikila;

¹⁴ kashika cheka nawa mungulinga yikomokeso ni vungu lino; te yikomokeso ni yipupu. Mana ja akwa mana jo kumakakuwa, ni malinjekela ja akwa malinjekela kumakafukiwa.

¹⁵ Lamba kuli waze akusweka kusuku ni Yehova kutaka cho, waze ali ni yitanga yo mu milima; kakwamba ngwo, Iya unatumono? Iya unatunyingika?

¹⁶ Enu nwakwalumuna yuma! Tengi mamumona ngwe chimuwika apwa ni uma? hanga chuma chize atengele muchamba ha kutwala kuli tengi ngwo, Kangutengele. Hanji chuma chize achiwumbile muchamba ha kutwala kuli mukwa kuwumba ngwo, Keshi mana?

¹⁷ Ngwami, Kulutwe lia shimbu likepe wika mapwisa Lebano ngwe munda wa mihuko, ni munda wa mihuko muupwa ngwe usaki.

¹⁸ Ha tangwa lize afwa-matwi mevwa maliji a mu mukanda, ni ku ufuku wo ni milima yo tupuputa mamona.

¹⁹ Mukwa kushimbika matambula uwahililo waha muli Yehova; ni yiswale hakachi ka atu kumakalikwiza muli mwe Musandu wa Izalele.

²⁰ Mumu chiswi makahwa ni mukwa kulenya malitwamina, ni waze eswe a kujikinyina kulinga chipi makaateta,

²¹ waze te ha liji limuwika kakupwisa mutu chivulumunyi. Yoze makanjisa mamutela muheto mu chikolo; yoze unasambe mamupiangula ni ungaji wamokomoko.

²² Kashika Yehova, yoze wakulile Apalahama, kanambe ha kutwala ku munyachi wa Yakomba ngwenyi, Yakomba kechi kevwa nawa sonyi, kumeso jo kechi kasolola nawa woma.

²³ Mumu ha kumona ana jenyi, yitanga ya moko jami hamwe nenyi, kumakasela ku usandu jina liami; kumakasela ku usandu mwe Musandu wa Yakomba nikuvwila woma wunji mwe Zambi ya Izalele.

²⁴ Ni waze a kuhenga mu mbunge mazuka chinyingi, ni waze akulinyenga matambula longeso.