Izaya 28 - MUKANDA USANDU WA ZAMBI 1975

¹ Lamba ku chipangula cha kulengumuka cha A-Eframe akwa kuzengewa, ni ku chitemo chumu cha upeme wo wa uhenya, chize chili ha mutwe wa chikulo cha chinuno cha waze hazeya ku vinyu!

² Mwene kali ni umwe chitakame cha ndundo; kapwa ngwe kangonga ka chiwe, ngwe kakundukundu wa kwonwona, ngwe kangonga ka meya a tachi a kukumba. Kumakanunguna hashi ni upupilo.

³ Chipangula cha kulengumuka cha A-Eframe akwa kuzengewa makachiliata ni molu;

⁴ ni chitemo chumu cha upeme wo wa uhenya, chize chili ha mutwe wa chikulo cha chinuno muchipwa ngwe kuyu lize lia kuhia shimbu mwaka kanda uchiheta; muze mutu malimona malilia ha kulikwata mu kwoko.

⁵ Ha tangwa lize Yehova-wa-Tujita makapwa chipangula cha uhenya, ni chipangula cha upeme ku masalila ja atu jenyi.

⁶ Makapwa mbunge ya ululi muli mukwa kupatula, ni tachi muli waze akuhilwisa jita mwe mu chikolo.

⁷ Wano nawa kakuzeketa mumu ha vinyu, kakupiepieta mumu ha kunwa chisasu; ni asasendote ni aprofeta kakuzeketa ni kunwa chisasu, kakutatajala mumu ha vinyu, kakupiepieta ni kunwa chisasu. Kamwene kanawa yuma ya kulutwe; kanatalinga ha kupatula.

⁸ Mumu mesa jeswe jazala ni yisaza; kweswe kuli luchisa wika.

⁹ Yoze Yehova malongesa mana iya? Yoze malumbunwina je sango iya? Te waze machiasumuna nyi? Waze machiachiza ku liele nyi?

¹⁰ Mumu chapwa ndongo ha ndongo, ndongo ha ndongo; mukala ha mukala, mukala ha mukala; hano hakehe, ako hakehe.

¹¹ Alioze Yehova mahanjika ni vungu lino kuli malinga a malimi eka, te a limi lia tundaka.

¹² Hanambe kuli wano ngwenyi, Uno we uhwimino ngwami, Hanenu uhwimino kuli akwa yikatalo; che kutula chenacho. Hindu kapanjikile.

¹³ Kashika liji lia Yehova kuli ayo mulipwa ndongo ha ndongo, ndongo ha ndongo; mukala ha mukala, mukala ha mukala; hano hakehe, ako hakehe; hanga akaye akalimbukile unyimenyime, akamakuke, akakwachike, akaoze.

¹⁴ Kashika, yenu akwa kulenya, nwayula vungu lino mu Yerusaleme, panjikenu liji lia Yehova!

¹⁵ Mumu hinwamba ngwenu, Etu hitwakolesa usendo ni ufwe, hitwalitesa ni Shiole; kashika muze chilungo cha kuzemuna muchipalika kuchichi kutuheta; mumu hitwatenga mahuza chiswamo chetu, kwonga chapwa uchinyino wetu.

¹⁶ Kashika Mwene Yehova kanambe ngwenyi, Talenu, ngunase yimwe fundamentu mu Zaione, liwe, liwe lia kweseka, liwe lilemu lia ha mbango, fundamentu ya ngú. Mweswe mafuliela kechi kalipupula.

¹⁷ Upatwilo wa kulita munguupwisa muhipu wami wa kufunjika nawo, ni ululi muupwa prumo yami. Chiwe muchikahungumuna chiswamo cha mahuza, ni meya makazemuna we uchinyino.

¹⁸ Mba usendo wenu ni ufwe maushiha; kulitesa chenu ni Shiole kuchichi kakola. Muze chilungo cha kuzemuna muchipalika, munukazemuka nacho.

¹⁹ Chisuho cheswe muchipalika muchinumbata; mumu muchipalika ha chimene ha chimene, ni mwalwa ni ufuku, mba kumuchikapwa we mwongo lume muze sango mujinulumbunuka.

²⁰ Mumu muhela wahiha naye, mutu kahashile kutandalaho, ni kanyime wakeha naye, mutu kahashile kulifuka nenyi.

²¹ Mumu Yehova makakatuka ngwe ha mulundu wa Perazime, makatenuka ngwe mu chikulo cha Ngibeone, akatange chitanga chenyi—chitanga chenyi cha kukomwesa, akalinge mulimo wenyi—mulimo wenyi weka.

²² Kashika kanda nulenya kuchina makolesa mihipu yenu; mumu hinevwa shimbi yimwe ya kwonwona kuli Mwene Yehova-wa-Tujita ha chifuchi cheswe.

²³ Selenu matwi nwivwe liji liami; panjikenu nwivwe kuhanjika chami.

²⁴ Mukwa kulimina mbuto ni sharua kakulima tangwa ha tangwa? Kakuchipa ni kuchipula mavu jenyi matangwa eswe?

²⁵ Muze hasalamisaho helu kakuwile mbuto ya ndila ni kuminyu, ni kusa tiliku mu mikala, ni sevada homa hayo, ni mbuka kwa kujingilika nyi?

²⁶ Mumu hamufumba kanawa; Zambi yenyi kakumulongesa.

²⁷ Keshi kuzungula ndila ni mutondo ulemu; hanji kuliata kuminyu ni roda ya temba. Alioze ndila kakuyizungula ni kambwechi, ni kuminyu ni kajana.

²⁸ Kakundonda mbuto ya mbolo? Hi chocho ko. Keshi kuyizungula matangwa eswe, muze mapalikisaho roda ya temba lienyi ni tuvwalu twenyi, kayifwenyene.

²⁹ Chino nawa chinakatuka kuli Yehova-wa-Tujita. Iye Wahiana ha kulongesa mana, yinyingi yenyi ye yipema.