Izaya 27 - MUKANDA USANDU WA ZAMBI 1975

¹ Ha tangwa lize Yehova ni katana kenyi mukalu ni munene, wa tachi, makafwetesa Leviatanu mwe lunoka wa kuzomboka, Leviatanu mwe lunoka wa kulikonyekakonyeka; makashiha mwe ndragau yoze watwama mu kalunga-lwiji.

² Ha tangwa lize ngwo, Imbilenu munda upema wa uva,

³ ni yami Yehova nguli kafunga kawo; nakuuhinjila ni kulitwamina ka. Nakuufunga ufuku ni mwalwa kuchina umwe maulinga chimwe chipi.

⁴ Kumwatwamine muli yami niumwe ufwatulo. Nyi kachi napwa ni mikalale yimwe hanji mingonga yimwe ya kulitachika nayo, kachi mungulindangana nayo, kachi munguyocha hamuwika.

⁵ Nyi ka, alikunjike kuli yami ngukaafunge, awane ni yami, awane ni yami.

⁶ Ha matangwa a kulutwe Yakomba masoka miji; Izalele matemuna yitemo ni kusokesa mafwo, ni kuzalisa hashi heswe ni mihuko.

⁷ Te haalamba ngwe walambile akwa kwalamba? Haashiha ngwe washihile akwa kwashiha?

⁸ Ha kwachiza nikulita ni cheseko, walitachikile no; yaachiza ni kangonga kenyi musasu ha tangwa lia fuji ya ku Chivumbuko.

⁹ Kashika ni chuma chino makukila uhie wa Yakomba, ni chino muchipwa mihuko yingunu ha kuchiza shili yenyi; muze mapwisa mawe eswe a yilumbilo ngwe mawe a wunga a kufwenyona tuyifwenyu. Niumwe Ashera, nichimwe chilumbilo cha insensu muchikamana.

¹⁰ Mumu chihunda cha kukolesa chatwama cha kúlú. Chihunda cha kwehuka ni kuchina, ngwe puya. Ana-a-ngombe kakuliako, kwenako kakuutama ni kuhulula mitango yacho.

¹¹ Muze mitango yawo hiyoma, mayimakwona, mba mapwo meza nikuyisa ha jiko. Mumu wano atu keshi meso a kunyingika; kashika Tangi yo kechi kaavwila keke; yoze waawumbile kechi kaavwila vumbi.

¹² Ha tangwa lize Yehova mazungula mbuto chize ku lwiji Ufrateze ndo ku chitwetwe cha Engitu, ni yenu A-Izalele manwanda umwe ha umwe.

¹³ Ha tangwa lize mahumuna chitavwi chinene, ni waze anatoko mu chifuchi cha Asuria ni waze aahumine aye ku Engitu meza akawayile Yehova ha mulundu usandu ku Yerusaleme.