Izaya 26 - MUKANDA USANDU WA ZAMBI 1975

¹ Ha tangwa lize kumakemba mwaso uno mu chifuchi cha Yunda ngwo, chihunda cha tachi tuli nacho; iye kakumika ulamwino ngwe yipanga-ya-mawe ni yipanga ya kukolesa.

² Azululenu mapito hanga vungu lia ululi lia akwa jika akahase kunjilamo.

³ Yoze majikijisa manyonga jenyi hali yena, mumufunga mu uhwimino wika, mumu kanakufuliela.

⁴ Fulielenu Yehova miaka yeswe mumu Yehova, Yehova iye luliwe lwa mutolo.

⁵ Mumu hananunguna waze atwamine kwilu mu chihunda cha kunangama. Hanachinunguna, hanachinunguna hashi ni kuchinyasa mu fufuta.

⁶ Chaliachiwa ni yiliato, yiliato ya yiswale, ngano ja akwa kuhona.

⁷ Jila ya mukwa ululi yinasalama; yena wakusalamisa jila ya mukwa ululi.

⁸ Yehova, tunakutwaminyina mwe mu jila ya upatwilo we. Jina lie lia kwiwuluka kuliapwa lia kuzanga mu mbunge jetu.

⁹ Mbunge yami kuyakukuvwila usona ha ufuku; spiritu yami muchima kuyakukufupa ni tachi. Mumu muze upatwilo we muupwa hashi, mba akwa muno-muze malilongesa ululi.

¹⁰ Chipwe malinga vumbi kuli chingulungulu, kalilongesele ululi; mu chifuchi cha kululama kakupiya, kamwene uhenya wa Yehova.

¹¹ Yehova, kwoko lie hiliazunduka, hindu kalimwene. Amone kama zango lie lia tachi hali atu je, akevwe sonyi. Kahia ka akwa kulimika ni yena kakaalalise.

¹² Yehova, kumukatupalila uhwimino, hiwatulingila yitanga yetu yeswe.

¹³ Yehova Zambi yetu, ene akwo hatuyula helu lia yena nawa, hindu tunatayiza jina lie wika.

¹⁴ O afu lume, kechi kapwa ni mwono; kapwa yizulie, kechi kahinduka; kashika hiweza kuli ayo ni kwaonwona, ni kwajimuna, kechi kaewuluka nawa.

¹⁵ Alioze yena Yehova hiwokesa lie vungu; hiwokesa lie vungu, ni yena hanakuchichimieka, hiwatokesa manjiza eswe a chifuchi.

¹⁶ Mu lamba lio akufupile yena Yehova, alembelelele ni tachi muze te yena unaafumbu.

¹⁷ Ngwe kafumbakaji yoze mapinda nikuteta mu misongo yenyi, muze tangwa lienyi hiliakundama, chocho twapwile yetu mumu hali yena Yehova.

¹⁸ Twapwile ni ufumba, twapinjile, alioze chapwa ngwe twasema fuji wika. Kutwalingile upulwilo hano hashi, niamwe akwa muno-muze kanungukine.

¹⁹ Afu je matwama ni mwono, mijimba yo muyihinduka. Enu nwaya ku fufuta, laulenu nukembe ni uwahililo! Mumu mume we wapwa wa pangu, mba ha chifuchi cha yizulie muuhinjila.

²⁰ Tweyenu atu jami, njilenu mu yipatulo yenu, nukaliajilile mapito jenu. Swamenu kashimbu ndo ufwatulo hiwapalika.

²¹ Mumu Yehova kanakatuka kuma kwenyi, kaneza akafwetese akwa hashi mumu ha uhenge wo. He hashi muhafukula manyinga aze hamwangaho, kuhechi kafuka nawa waze afwileho.