Izaya 24 - MUKANDA USANDU WA ZAMBI 1975

¹ Yehova kumakenyeka he hashi nikunongesa atu jaho. Kumakalumunaho nikumwanga waze atwamaho.

² Mba chize muchipwa ni atu, chocho nawa ni sasendote; chize muchipwa ni ndungo, ni kako chizechene; chize muchipwa ni ndungo-wa-pwo, ni kako chizechene; chize muchipwa ni mukwa kulanda, ni mukwa kukulisa chizechene; chize muchipwa ni mukwa mukuli, ni mwenya mukuli chizechene; chize muchipwa ni mukwa kufwetesa mbwezo, ni mukwa kufweta chizechene.

³ Kumakenyeka he hashi ni kupupaho liakulu mumu Yehova hanahanjika liji lino.

⁴ Hashi kuhanalili ni kulela, muno-muze munahongo ni kulela; ni malilu kanahongo hamwe ni hashi.

⁵ Hashi hapwa ha luchisa kushi lia yiliato ya waze atwamaho, mumu hanatangula shimbi, hanavulumuna yiyulo, hanashihi usendo wa miaka yeswe.

⁶ Kashika shingo linawumbula he hashi, ni akwa hashi kanamono lamba mumu ha uhie wo. Kashika akwa hashi kanapapiwa ni malunga akehe wika asala.

⁷ Vinyu yinalishimwoka, ni mitondo ya uva yinahongo, akwa mbunge ja chiseke eswe kanatu mikuma.

⁸ Kuwaha cha tumikupiela chinaholo, chizungozungo cha akwa kulikwiza hichahwa, kuwaha cha kalialia chinaholo.

⁹ Hanalitwamina kunwa vinyu ni kwimba; kunwa chisasu chinapangaminya kuli waze akuchinwa.

¹⁰ Chihunda cha chimbangwinya hichapuzuka; mazuwo eswe hanaayiki, chocho niumwe mahasa kunjilamo.

¹¹ Ku matapalo muteto uliko mumu ha kuhona vinyu; uwahililo weswe hiwaheta ku songo ngwe chingoloshi; chiseke cha hashi hanachihumu.

¹² Chihunda hanachihichika cha hululu; mapito hanaapupu ndo hapujieka.

¹³ Mumu chocho muchikapwa hashi hakachi ka mavungu, ngwe mutondo wa olevwe muze maunyika, ha mwaka wa kwandanda muze te hamana kucha.

¹⁴ Kanahetula liji lio nikwimba mumu ha uwahililo; ku Chitokelo kakutambika mumu ha uhenya wa Yehova.

¹⁵ Kashika ni ku Chivumbuko Chichimiekenu Yehova; ni mu yifuchi ya ku mbaka Chichimiekenu jina lia Yehova Zambi ya Izalele.

¹⁶ Chize ku masongo a hashi tunevu miaso ya uhaliso, ya uhenya kuli Mukwa Ululi. Hindu yami ngunambe ngwami, Ngunapokieka, ngunapokieka. Lamba liami! Mumu akwa mafwefwe kanalingi ni mafwefwe, ni akwa mafwefwe kanalingi chikolo ni mafwefwe.

¹⁷ Enu akwa hashi, mwongo hiwanuwana, ni wumbu, ni kambwila!

¹⁸ Yoze machina ha kwivwa mwongo maholoka mu wumbu; mba yoze makatuka mu wumbu mafwa mu muheto. Mumu manjanela a mwilu hanazuluka, ni fundamentu ja hashi jinachikima.

¹⁹ Hashi hanamakuka; hashi hanapulika ndusu; hashi hanachikima ni tachi.

²⁰ Hashi hanapiepieta ngwe mukwa kuzengewa, hanatekenga ngwe chikulika. Utanguko waho unashate, muhaholoka, mba kuhechi kuhinduka nawa.

²¹ Ha tangwa lize Yehova makafwetesa mbunga ya mwilu, mwilu, ni mianangana ja hashi, hashi.

²² Kumakaakungulula ngwe funge mu wina; kumakaayikila mu zuwo lia ususu, mba kulutwe lia matangwa anji makaafwetesa.

²³ Henaho kakweji makalifwita, ni tangwa mulikevwa sonyi; mumu Yehova-wa-Tujita makayula ha mulundu wa Zaione ni mu Yerusaleme, ni kumeso ja makulwana jenyi makasolola uhenya wenyi.