Izaya 23 - MUKANDA USANDU WA ZAMBI 1975

¹ Liji lia kutwala ku Teru ngwo, Lilenu mbimbi enu mato a Tashi, mumu hanenyeka Teru. Kukushi zuwo chipwe kuze mahasa kunjila! Chize ku chifuchi cha Kitime hanaalwezecho.

² Enu, nwatwama ku mbaka, holenu; enu, akwa kusepa a ku Sendone, mikeji jenu apalikile ha kalunga-lwiji, apwile ha meya anji eka ni eka.

³ Nwafumbwile ni mbuto ya ku Shihore ya kucha ku Nilo. Nwapwile akwa kusepa ja mavungu.

⁴ Ena Sendone, ivwa sonyi, mumu kalunga-lwiji hanahanjika, ye mbonge ya ku kalunga-lwiji ngwenyi, Chafumbajalile, chipwe kusema, chatelele akweze, chipwe kuhoka *avirgem.

⁵ Ha kuheta lufuma wacho ku Engitu, kwapwile kulifwita mu mbunge mumu ha sango ja ku Teru.

⁶ Enu akwa mbaka, palikenu ku Tashi nukalile mbimbi.

⁷ Chihunda chenu cha kulikwiza chenacho? Chize chaputukile kushi chikolo, molu jo atwalile atu jacho akatunge kusuku.

⁸ Yoze wafunjikile chino cha kulimika ni Teru, iya? Teru wapwile nikuhana yipangula; akwa kusepa jako apwile akwa kuyula, ni akwa kutalika jako apwile alemu a hashi.

⁹ Yehova-wa-Tujita hanachifunjika, akachise kulengumuka cha uhenya weswe, akalelese alemu eswe a hashi.

¹⁰ Hiana chifuchi che cheswe ngwe Nilo, ena mwana-pwo wa Tashi, mumu nichimwe chikwiko kuchishiko nawa.

¹¹ Hanazozo kwoko lienyi ha kalunga-lwiji, hananyikisa mawanangana; Yehova hahana shimbi ya kutwala kuli Kanana akonwone mbonge jako.

¹² Yamba ngwenyi, Ena mwana-pwo wa *virgem Sendone kanakupinjisa, kuchi kulikwiza nawa. Katuka uzauke ku Kitime, alioze chipwe kuze kuchi kuwana uhwimino.

¹³ Talenu chifuchi cha A-Kaletea! E atu wano, hi A-Asuria ko. Apalile kusela Teru kuli tushitu a mu yambu. Atungileko tuposhi a kuseleka, apuzwile mazuwo jenyi a mianangana, ayipwishile ya hululu.

¹⁴ Enu mato ja Tashi, lilenu mbimbi mumu uswamino wenu hanawenyeka.

¹⁵ Ha tangwa lize mavulama Teru ha shimbu lia makumi shimbiali a miaka, ngwe matangwa ja mwanangana umuwika. Ha kuhwa makumi shimbiali a miaka muchikapwa ku Teru ngwe mu mwaso wa chikoi ngwo,

¹⁶ Anda kalialia, jinga chihunda, ena chikoi hakuvulama. Tomba mwaso upema, imba miaso yinji hanga akwiwuluke.

¹⁷ Ha kuhwa makumi shimbiali a miaka Yehova mahilukila Teru nawa, mba Teru malinga nawa milimo yenyi ya fweto akapwe chikoi kuli akwa mawanangana eswe a munomuze he ha mavu.

¹⁸ Yuma yenyi ya kutalika ni fweto yenyi makayitumbikila kuli Yehova. Kechi kayitulika hanji kuyitongowenya, alioze yuma yenyi ya kutalika muyipwa kulia cha kulumbama ni mazalo apema kuli waze anatwama kumeso ja Yehova.