Izaya 22 - MUKANDA USANDU WA ZAMBI 1975

¹ Liji Iia kutwala ku chikulo cha usolwelo ngwo, Kuchi chinalumbunuka hinwakanduka eswe helu lia mazuwo,

² nwazala ni kukalumioka, chihunda cha Chizungozungo chihunda cha kulikwiza? Afu jenu kaashihile ni katana hanji mu jita.

³ Akwa kunuyula hachina hamuwika, hanaakwata ni uta wakuhi. Eswe hakachi kenu awanyine akwachile, chipwe hachinyina kusuku.

⁴ Kashika nambile ngwami, Tewulukenu kuli yami, hanga ngulile masoji asasu. Kanda nuhondangana nikunguwumbijeka mumu ha kunonga cha mwana wa pwo atu jami.

⁵ Mumu Mwene Yehova-wa-Tujita kali ni tangwa lia Chizungozungo ni kuliataliata ni kutatajala mu chikulo cha usolwelo. Cho kupupa yipanga-ya-mawe ni kukalumioka ku milundu!

⁶ Elame yambata chindalo hamwe ni matemba-a-jita ni akwa tuvwalu; ni Kiri yafukula lukepwe.

⁷ Yikulo yenu yahiana kupema yiyizala ni matemba ni akwa tuvwalu yamana kwe ku yikolo.

⁸ Hachiza chifuko cha Yunda. Ha tangwa lize nwatalile ku yitwa ya mu zuwo lia usaki,

⁹ nwamwene yituwa ya mu chihunda cha David te yinji, mba nwapumbile meya eswe a Chitende cha ku mwanda.

¹⁰ Nwalwile mazuwo a mu Yerusaleme hi kupuzula mazuwo hanga nukakolese chipanga-cha-mawe.

¹¹ Nwalingile chikwachilo cha meya hakachi ka yipanga yiali ha meya a mu Chitende chikulu. Alioze kunwatalile kuli yoze wachilingile, chipwe kusa mbunge kuli yoze wachifunjikile kushi chikolo.

¹² Ha tangwa lize Mwene Yehova-wa-Tujita yatambika mutambi wa kulila ni kulishimwoka, ni kulitewula ni kuzala chikeleyi;

¹³ alioze kumanyi uwahililo ni chiseke, ni kushiha ngombe ni mapanga, ni kulia yifwo ni kunwa vinyu ngwo, Tulienu, tunwenu, mumu hamene mutufwa.

¹⁴ Yehova-wa-Tujita hanalisolola mu matwi jami ngwenyi, Pundu kechi kanukonekena uhenge uno ndo munufwa. Chocho kanambe Mwene Yehova-wa-Tujita.

¹⁵ Mwene Yehova-wa-Tujita kanambe ngwenyi, Yako kuli yono kaselo, kuli Shepena, yoze wayula zuwo ukambe kuli iye ngwe,

¹⁶ Yika unalingi kuno? Uli neya kuno hiwalitotela kuno fuka? Hiwalitotela fuka ha mulundu, nikwola zuwo lie mu luliwe?

¹⁷ Yehova makunyasa haze ni tachi, ena mukwa tachi. Kumakakukwata ngo lume,

¹⁸ makakujinga ni tachi ni kukukonga ngwe mbola mu chifuchi chinene, mba kwenako mukafwa, ni kwenako makatwama matemba je a uhenya; ena uli je sonyi ja zuwo lia kakenu.

¹⁹ Mungukakuchiza ku milimo ye; makakhnyasa kuma kwe kwanangama.

²⁰ Ha tangwa lize mungukasanyika kavumbi kami Eliakimi mwana Hilekia,

²¹ mba mungukamujika ni hina lie lia ngungu; mungukamujichika muya we hali iye; chiyulo che mungukachisa mu kwoko lienyi, mba iye kumakapwa tato kuli akwa Yerusaleme ni kuli A-Yunda.

²² Mungukasa ha chipaya chenyi sapi ya zuwo lia David. Iye kumakazulula mba niumwe makájila; kumakájila, mba niumwe makazulula.

²³ Kumungukamukolesa ngwe lumbambo homa hakola, mba iye kumakalumuka ngunja ya ulemu ku munyachi wa tato.

²⁴ Kumakazezeleka hali iye ulemu weswe wa munyachi wa tato, ana ni ajikulu, tuyikwachilo tweswe chize ku misenge ndo ku milondo yeswe.

²⁵ Yehova-wa-Tujita kanambe ngwenyi, Ha tangwa lize lumbambo yoze te angukolesele homa hakola kumakasokoka. Makamuteta, makaholoka, mba chiteli chize chapwileho makachiteta, mumu Yehova hanachambe.