Izaya 21 - MUKANDA USANDU WA ZAMBI 1975

¹ Liji lia kutwala ku puya ya kalungalwiji, ngwo, Chizechene ngwe yijimbi ya mu Negeve yinayi lume, kuchinakatuka ku puya, ku chifuchi kole ni mwongo.

² Usolwelo ukalu hangulweza; mukwa kupupa kanapupu; mukwa kwonwona kanonwona. Kandukenu, akwa Elame! Selekenu, akwa Media! Mikuma yeswe hatwisa mungumanununa.

³ Kashika miongo yami yazala ni kupinda, misongo yangukwata, misongo ya pwo nikufumbajala. Ngunafumbama, kashika Chahashile kwivwa. Ngunalifwichi, kashika Chahashile kumona.

⁴ Mbunge yami yinalifwichi, mwongo hiwangukumba; ufuku wami wa kuwaha hanangwalumwinawo kuchikima.

⁵ Alenu mesa, Selenu kalayi, lienu, nwenu. Hindukenu, enu alemu; senu maji ha lukepwe.

⁶ Mumu Mwene hanambe kuli yami ngwenyi, Senu kalayi, ambulule chize anamono.

⁷ Yamona akwa tuvwalu, aali ha aali, akwa kwenda hali yimbulu, ni akwa kwenda hali tumelu, yapanjika kanawa, yapanjika chikolo chikolo.

⁸ Mba yakalumuka ngwe ndumba ngwenyi, Mwene, ngunamana ha kaposhi wa kalayi nganganga mwalwa weswe, ni kokwene kuma kwami ufuku ha ufuku ndusu.

⁹ Kumanyi akwa tuvwalu, aali ha aali. Mba yakumbulula ngwenyi, Babilonia hanunguka, hanunguka! Ni tuponya twa mazambi jamo hanapalwola hashi.

¹⁰ Mama yami, kuzungula chami, ni mbuto ya ha chizungwilo chami! Cheswacho hinevwa kuli Yehova-wa-Tujita, mwe Zambi ya Izalele, ngunanwambulwilacho.

¹¹ Liji lia kutwala ku Nduma ngwo, Umwe ku Sere kanasanyika kuli yami ngwenyi, Kalayi! Ufuku kuchi wapwa? Kalayi! Ufuku kuchi wapwa?

¹² Kalayi kanakumbulula ngwenyi, Chimene kuchineza ni ufuku nawa. Nyi munuhula, hulenu, alioze hilukenu nwize.

¹³ Liji lia kutwala ku Arabia ngwo, Enu yendo ya ku Ndetane, mu usaki wa Arabia munupomba.

¹⁴ Enu nwatwama mu chifuchi cha Tema, hanenu meya kuli akwa pwila, patwizenu mukwa kuchina, ni mbolo.

¹⁵ Mumu ku tutana anachina, te ku tutana a kutomona, ni ku uta wa kunana, ni ku tachi ja jita.

¹⁶ Mumu Mwene hanambe kuli yami ngwenyi, Kunuchi kuhiana mwaka, ngwe mwaka wa mukwa kulingila fweto, mba uhenya wa Keta muuhwa,

¹⁷ ni waze malisalaho a kuli ngashi a tachi ja ana ja Keta mapwa akehe wika, mumu Yehova Zambi ya Izalele hanachambe.