Izaya 2 - MUKANDA USANDU WA ZAMBI 1975

¹ Liji Izaia mwana Amoze yamona ha kutwala ku Yunda ni Yerusaleme.

² Muchiza kupwa ha matangwa a kusula mulundu wa zuwo lia Yehova maukolesa ukahiane milundu yeswe ha kusuha. Maunangamisa helu lia mindundena yeswe, mba mavungu eswe matalikisako.

³ Akwa minyachi yinji meza ngwo, Tuyenu tukanduke ku mulundu wa Yehova, ku zuwo lia Zambi ya Yakomba; atulongese ndako jenyi tukende mu majila jenyi. Mumu mwe mu Zaione mumutuhukila shimbi, liji lia Yehova mulituhuka mu Yerusaleme.

⁴ Iye makapatwila mavungu, makasela yiyulo hali minyachi yinji. O makalumuna tutana two akapwe yikungo ya sharua, makalumuna makunga jo akapwe poko ja kululika mitondo ya mihuko. Akwa vungu limwe kechi kasa jita ya katana ni akwa vungu likwo; kechi kalilongesa nawa kwasa jita.

⁵ Enu akwa munyachi wa Yakomba, tweyenu tukende mu pangu lia Yehova.

⁶ Mumu hiwalituna atu je, e akwa munyachi wa Yakomba, mumu hazala tò ni tahi ja ku Chivumbuko, ni akwa munanyi a kulifwa ni A-Filistea; kakukwata moko ni tundaka.

⁷ Chifuchi cho chazala tò ni prata ni oru, upite wo kuushi ni haze wasulila. Chifuchi cho chazala tò ni tuvwalu, matemba jo keshi ni haze asulila.

⁸ Chifuchi cho chazala tò ni tuponya; kakuhetamina hashi ku yitanga ya moko jo, yize minwe yo hiyalinga.

⁹ Chocho atu kakwakehesa, chocho kakulimbula atu— kanda uakonekena!

¹⁰ Njilenu mu luliwe, swamenu mu fufuta, kumeso ja mwongo wa Yehova, ni ku uhenya wa wanangana wenyi.

¹¹ Kumakalelesa meso ja atu a kulizata; kulengumuka cha atu kumakanunguna; Yehova wika kumakanangama ha tangwa lize.

¹² Mumu Yehova-wa-Tujita kali ni tangwa lia kulimika ni akwa kulengumuka ni akwa kulizata eswe, kulimika ni akwa kulifuza eswe ni kwanunguna,

¹³ kulimika ni mitondo yeswe ya sedru ya mu Lebano, akwa kulifuza ni akwa kulinangamisa; ni kulimika ni mitondo yeswe ya carvalho ya mu Mbashane;

¹⁴ kulimika ni milundu yeswe yisuku, ni mindundena yeswe ya kulinangamisa;

¹⁵ kulimika ni kaposhi mweswe musuku, ni chipanga cheswe cha mawe cha kukolesa ha jita;

¹⁶ kulimika ni mato eswe a ku Tashi ni mato eswe apema.

¹⁷ Kumakanunguna kulizata cheswe cha atu; kumakalelesa kulengumuka cheswe cha atu; Yehova wika kumakanangama ha tangwa lize.

¹⁸ Ni mahamba eswe kumakahwa wupu!

¹⁹ Mba atu makanjila mu yivwenge ya yimawe, ni mu mena a hashi, akaswamine mwongo wa Yehova, ni uhenya wa wanangana wenyi, muze makatuka akakolese mwongo he hashi.

²⁰ Ha tangwa lize atu kumakambila ku kolo ni yinguzu mahamba jo a prata ni mahamba jo a oru, aze alingile hanga akaakombelele,

²¹ akanjile mu yivwenge ya yimawe, ni yivwenge ya mu mambongo, akaswamine mwongo wa Yehova, ni uhenya wa wanangana wenyi, muze makatuka akakolese mwongo he hashi.

²² Tewuluka kuli mutu yoze uli ni mwiku wenyi mu mazulu, mumu ulemu uka ali nawo?