Izaya 19 - MUKANDA USANDU WA ZAMBI 1975

¹ Liji lia kutwala ku Engitu. Talenu, Yehova kanende ha lelwa lia tambu, kaneza ku Engitu. Kashika tuponya twa Engitu kanachikima kumeso jenyi, ni mbunge ja A-Engitu kumujikasangunuka muchima lio.

² Munguvundula A-Engitu akalimike ni A-Engitu, kumakasa jita, mutu mweswe ni usoko wenyi ni mutu mweswe ni mwenyembo wenyi. Chihunda muchikalimika ni chihunda, akwa wanangana umwe malimika ni akwa wanangana ukwo.

³ Maspiritu ja muchima lia A-Engitu munguzukula; munguvundangenya yikuma yo. Kumakaya kuhula ku mahamba, ni yimbanda, ni akwa mahamba ni akwa tufutafuta.

⁴ Mungukunjika A-Engitu kuli umwe mukalu kwayula. Umwe mwanangana wa uswi makaayula. Chocho kanambe Mwene Yehova-wa-Tujita.

⁵ Meya a kalunga-lwiji makoma, ni mwe lwiji makoma chau;

⁶ tupila twenyi kumakakupuka fu, ni yitwetwe ya Nilo ya Engitu muyikahu wa ni kutepuluka, mbungu ni manenga muyikapola.

⁷ Yana ya ku Nilo kwe ku mbumbulu ya Nilo, yize yeswe ya kutumba ku Nilo muyikoma ni kujimuka, kumuyikahwa.

⁸ Akwa kutela yishi kumakalishimwoka ni kulinyenga, waze eswe a kusa tuzambu mu Nilo. Akwa kutela manda ha meya kumakatuma.

⁹ Akwa kuhondangana ni linyu lia kusakula kumakalezumuka mu mbunge, ni akwa kuseleka wanda utoma.

¹⁰ Waze anapu ngwe manguji a chifuchi mawondeka, ni eswe akwa kulingila fweto malinyenga.

¹¹ Alemu a Zoane kanahepuka liakulu; akwa kulongesa mana Falau kanamulongesa uzuzuke. Kuchi muwamba kuli Falau ngwe, Nguli mwana wa mukwa mana, nguli mwana wa mianangana a shakulu?

¹² Akwa mana jenu kuli ali? Anulweze asolole chize Yehova-wa-Tujita hanapale ha kutwala ku Engitu.

¹³ Alemu a Zoane hanalumuka yihepuke; alemu a Nofe hanongoloka. Waze anapu mawe a ha mbango ja minyachi hanapiangula Engitu mu jila.

¹⁴ Yehova hachinga muli ayo mbunge ja kulihiza, mba hapiepietesa A-Engitu mu yitanga yo yeswe ngwe mukwa kuzengewa kakupiepieta mu yisaza yenyi.

¹⁵ Niyimwe milimo kuyichi kapwa kuli A-Engitu yize mutwe hanji muchila muuhasa kulinga, hanji mutango wa mungaji, hanji lumbungu.

¹⁶ Ha tangwa lize A-Engitu mapwa ngwe mapwo. Machikima ni woma shimbu te kwoko lia Yehova-wa-Tujita kanda lichinyika hali ayo.

¹⁷ Akwa chifuchi cha Yunda makòlesa mwongo A-Engitu. Mweswe mamulwezacho mevwa woma mumu ha chikuma chize Yehova-wa-Tujita hapala hali ayo.

¹⁸ Ha tangwa lize kumukukapwa mu chifuchi cha Engitu yihunda yitano kuze mahanjika limi lia Kanana ni kulishinga kuzeyela Yehova-wa-Tujita. Chimwe muchikapwa ni jina lia Chihunda cha Kwonwona.

¹⁹ Ha tangwa lize hakachi ka chifuchi cha Engitu kumukukapwa chilumbilo kuli Yehova, ni nguji limwe kuli Yehova he ha njiza.

²⁰ Kumulikapwa chilayi kanda Shindakenyo hali Yehova-wa-Tujita mu chifuchi cha Engitu. Muze makateta kuli Yehova mumu hali akwa kupinjisa iye kumakaatuma chilamwina, yoze maafunga nikwapulula.

²¹ Mba Yehova kumakalisolola kuli A-Engitu, no manyingika Yehova ha tangwa lize. Mamuwayila ni yitapo ni milambu ya kulumba. Malilakenya ni shingo kuli Yehova, mba malinga yilakenyo yo.

²² Mba Yehova malamba Engitu, kulamba ni kuwuka, no kumakahiluka kuli Yehova, aye makevwa kulembelela cho; makaawuka.

²³ Ha tangwa lize kumukukapwa tapalo hakachi ka Engitu ni Asuria. A-Asuria makeza ku Engitu, ni A-Engitu makaya ku Asuria, ni A-Engitu makawayila hamwe ni A-Asuria.

²⁴ Ha tangwa lize vungu lia Izalele mulipwa liamuchitatu hamwe ni Engitu ni Asuria; akwa kuwahisa hakachi ka hashi,

²⁵ waze Yehova-wa-Tujita hawahisa ngwenyi, Akawahe atu jami A-Engitu, ni A-Asuria, chitanga cha moko jami, ni A-Izalele chihinga chami.