Izaya 18 - MUKANDA USANDU WA ZAMBI 1975

¹ Lamba! Chifuchi cha kunuma cha mapulwa sali lize lia njiji ja Etiopia;

² chize chakutuma mikeji ha kalunga-lwiji mu mato a mbungu ha meya! Yénu, mikeji a tambu, ku vungu lia atu asuku, asenena, ku vungu lia atu a kukolesa woma kwihi ni kusuku, vungu lia tachi, lia kukumba; chifuchi cho cha kupulapula ni njiji.

³ Yenu eswe akwa hashi, enu nwatunga muno-muze, muze mamika mbandeira ha milundu, talenu! Muze mahumuna chitavwi, panjikenu!

⁴ Mumu Yehova wambili kuli yami ngwenyi, Kuma kwami kwakutwama munguhwima nikutala, ngwe chivukuminya cha kutemuka ni mwalwa, ngwe lelwa lia mume ha chivukuminya cha kucha.

⁵ Mumu shimbu kanda tuheta ku kucha, muze yitemo hiyaholoka, te yitemo muyalumuka uva ja kuhia, iye kumakateta mitango ni poko, ni mitango yize yatanda muyinonga lume.

⁶ Eswe maahichika hali tujila akulia yifwo mu milundu, ni hali tushitu a mu yambu. Tujila akulia yifwo matwamaho ha mwaka wa chivukuminya, tushitu a mu yambu matwamaho ha mwaka wa chishika.

⁷ Ha mwaka uze maneha milambu kuli Yehova-wa-Tujita ku vungu lia atu asuku, asenena, ku vungu lia atu a kukolesa woma kwihi ni kusuku, vungu lia tachi, lia kukumba; chifuchi cho cha kupulapula ni njiji, kwe ku mulundu wa Zaione, kuma kwa jina lia Yehova-wa-Tujita.