Izaya 17 - MUKANDA USANDU WA ZAMBI 1975

¹ Liji lia kutwala ku Ndamaseku ngwo, Ndamaseku kuyichi kupwa limbo nawa; muyipwa mulumba wa yiswaswa.

² Yihunda yenyi mayichina ndo ku miaka yeswe; kumuyipwa wendelo wa yimuna waze mautaminako, mba niumwe maavwisa woma.

³ Mbonge kuyichi kusoloka ku Eframe, wanangana kuuchi kupwa ku Ndamaseku; ni masalila ja A-Seria kumapwa ngwe uhenya wa A-Izalele. Chocho kanambe Yehova-wa-Tujita.

⁴ Ha tangwa lize uhenya wa Yakomba maununguna, ni maji a musunya wenyi mawangama.

⁵ Kumuchikapwa ngwe muze mukwa kucha macha mbuto, ni kwoko lienyi mulikacha mitwe, ngwe muze umwe mahulula mitwe ya mbuto mu chikulo cha Refane.

⁶ Mbuto yimwe muyilisalaho, ngwe muze masunga mutondo wa olevwe— mihuko yiali hanji yitatu ha masongo a mitango ya kwilu; yiwana hanji yitano ha mitango ya mutondo wa mihuko. Chocho kanambe Yehova Zambi ya Izalele.

⁷ Ha tangwa lize atu mazewula Tangi yo, meso jo matala kuli mwe Musandu wa Izalele.

⁸ Kechi kanyonga nawa yilumbilo yize ya kulinga ni moko jo; kechi katala ku yuma yize ya kulinga ni minwe yo, chipwe Ashera hanji yilumbilo ya insensu.

⁹ Ha tangwa lize yihunda ya kukolesa muyikapwa ngwe yikulu ya A-Hevwe ni A-Amore, yize ahichikile mumu hali A-Izalele. Chifuchi muchikapwa cha hululu.

¹⁰ Mumu hinwavulama mwe Zambi ya ulamwino wenu, kunwewulukile Luliwe lwa uchinyino wenu. Kashika chipwe munutumba mitondo yipema, ni kutumba yitondo ya zambi umwe wa tundaka,

¹¹ chipwe munuyitatwisa ha tangwa lize nwayitumba, chipwe munuyitemwisa yitemo ha chimenemene chize munukuwa, hindu kucha muchikahumuka ha tangwa lia chinyengo ni yikola yize kuyishi yitumbo.

¹² Cho kunuma cha mavungu anji, kananumu ngwe kunuma cha kalunga-lwiji! Cho kuchungula cha mavungu, kanachungula ngwe kuchungula cha meya anji!

¹³ Mavungu kanachungula ngwe kuchungula cha meya anji. Alioze kumakaakanda mba machina kusuku. Maahuma ngwe yizungu mu fuji ha milundu, ngwe fufuta ya kuhehula kulutwe lia kangonga.

¹⁴ Ha chingoloshi, kumanyi mwongo! Shimbu kanda kucha o keshiko nawa! Chenacho muchipwa kuli akwa kutupupa, che chihinga cha waze mapunda yuma yetu.