Izaya 16 - MUKANDA USANDU WA ZAMBI 1975

¹ Ku Sela tumenu mwana-panga kuli mukwa kuyula chifuchi, mu jila ya puya, ku mulundu wa mwe mwana-pwo Zaione.

² Mapwo a Moape ku yau ya Arnone, kanapu ngwe tujila a kupupula mapulwa, ngwe ana-tujila a kumwanga ku yaswa yo.

³ Hanenu chiyulo, yulenu nikulita; chihuhumuke chenu tangwa ha muchima chikapwe ngwe ufuku pwi. Swekenu waze keshi chifuchi, kanda nukunjika waze anachina.

⁴ A-Moape keshi chifuchi atwame hakachi kenu; pwenu chiswamo kuli ayo mumu hali chonwonyi. Muze mukwa kupinjisa hahwa ni kwonwona hichapatuka, ni mukwa kuliataliata hajimuka mu chifuchi,

⁵ mba makolesa ngunja ni utu wa zango, henaho matwama ni umwenemwene mu mbalaka ya David umwe mukwa kupatula ni kufupa ululi, umwe malipupwisa kulinga chize Chinalulama.

⁶ Hitwevwa liji lia kulengumuka cha Moape chize alengumukine, ni kulitohesa, ni kulifuza, ni kulizata. Kulisamba chenyi chapwile cha kwonga.

⁷ Kashika Moape alile mbimbi ni atu eswe alilile mbimbi Moape. Lishimwokenu nikulifwita, ha fundamentu ja Kiri-Haresete.

⁸ Mumu minda ya Heshebone yinalele, hamwe ni mutondo wa uva wa Sibima; alemu ja mavungu hasemba mitango yawo, yize yatanjile ndo ku Yazere nikuheta kwe ku puya; mitango yawo yatanjile kusuku nikuzauka kalunga-lwiji.

⁹ Kashika ngunalili ni kulila cha Yazere ha mukunda wa mutondo wa uva wa Sibima. Enu Heshebone ni Eleale ngunanuhinjila masoji jami, mumu kukalumioka cha jita hichakwata ha mihuko yenu ni kucha chenu.

¹⁰ Uwahililo ni chiseke hanayichiza ku minda ya mihuko. Mu minda ya uva kembile nawa miaso, katambikile; niumwe mukwa kukama kanalingi milimo yenyi mu ukamino wa uva; mitambi ya kucha hiyahola.

¹¹ Kashika muchima wami kuunatu mikuma ngwe kalialia mumu hali A-Moape, ni mbunge yami nawa hali A-Kiri-Haresete.

¹² Chikwo nawa muze A-Moape masoloka, muze malikatalisa ha nangamo, muze meza kuma kwenyi kwajila akalembe, hindu kechi hakumba.

¹³ Liji lienalio Yehova wambile hali A-Moape kunyima.

¹⁴ Alioze haliapwila Yehova kanambe ngwenyi, Ha miaka yitatu, ya kulita ni miaka ya mukwa kulingila fweto, uhenya wa Moape maupwisa sau, chipwe chihuji chinene chiliko, ni waze malilamwina mapwa akepe ni alelu.