Izaya 15 - MUKANDA USANDU WA ZAMBI 1975

¹ Liji lia kutwala kuli Moape, ngwo, Are wa Moape hiwafwa; hanamupupu ha Ufuku umuwika; Kiri ya Moape hiyafwa, hanayipupu ha ufuku umuwika.

² Mwana wa Ndibone wa pwo hanakanduka ku manangamo akalile. Moape kanalili mbimbi ha Nebo ni Medeba. Mutwe weswe wa kawewe, ni wevu weswe wa kutewula.

³ Ha matapalo kanazala chikeleyi; mutu mweswe kanalili mbimbi nikusangunuka ni masoji, ha mafulumba ni ha malindalinda.

⁴ Heshebone ni Eleale kanatete, liji lio kanalivu ndusu ndo ku Yahaze; kashika tujita a Moape kanatete ni tachi, ni mbunge jo jinachikima,

⁵ mbunge yami yinatete mumu ha Moape; waze anakatukako kanachinyina ku Zoare, ni ku Eglata-Shelishia. Mumu ha ukandukilo wa Luhite kanakanduka nikulila. Mu jila ya ku Horonaime kanakalumioka ni liji lia kwonwona.

⁶ Meya a ku Nimerime hanaenyeka; mwambu unomu; yisokoloke hiyalela; yuma ya wisu kuyishiko nawa.

⁷ Kashika kulumbama chize hazuka ni yize yeswe hatulika, hambata ni kuzauka nayo Chitwetwe cha Yiseso.

⁸ Mumu muteto hiwapalika mweswe mu chifuchi cha Moape; mbimbi hiyaheta ndo ku Egalime, mbimbi hiyaheta ndo ku Mbia-elime.

⁹ Mumu meya a ku Ndibone hachila ni manyinga; hindu munguneha ha Ndibone chikwo nawa; munguneha ndumba hali waze A-Moape malilamwina, hali masalila a mu chifuchi.