Izaya 14 - MUKANDA USANDU WA ZAMBI 1975

¹ Yehova kumakavwila keke A-Yakomba; kumakatongola cheka nawa A-Izalele, ni kwasa mu chifuchi cho ene. Chipwe tundaka malifutula no ni kulalaminya ku munyachi wa Yakomba.

² Akwa mavungu maanda, maatwala kuma kwo, ni akwa munyachi wa Izalele maazuka mu chifuchi cha Yehova ngwe ndungo ja malunga ni a mapwo. Kumakakwachila funge waze aafungile funge ayo, makayula waze aapinjishile.

³ Muze Yehova hanuhwimisa ku yikola yenu, ni kulifwita chenu, ni milimo yenu yikalu yize anulingishile,

⁴ henaho munuyunga mwanangana wa Babilonia ni maliji wano ngwenu, Mukwa kupinjisa hasula Chichize! Ufwatulo wa lenyo hiwasula chocho!

⁵ Yehova hamakuna mbwechi ya yingulungulu; hamakuna lukanda wa akwa kuyula,

⁶ yoze wapwile nikulamba mavungu ni ufwatulo, ni kulitwamina ka. Wayulile mavungu ni utenu ni yihungumiona yikalu chikolo.

⁷ Hashi heswe hahwima, hahola; ni atu haputuka kwimba.

⁸ Mitondo ya kupresu yinakusehe, ni misedru ya mu Lebano ngwo, Hanga akunungwine hashi, niumwe mukwa kupakula kejile kulimika ni yetu.

⁹ Shiole mushi yinalisungu kukupatwiza muze muwiza; nikuvundula yizulie yeswe kukusambilila; waze eswe apwile tusongo twa hashi. Waze eswe apwile mianangana ja mavungu, yinaakatwisa ha ngunja jo.

¹⁰ Eswe mahanjika, mamba kuli yena ngwo, Yena nawa hiwalela ngwe yetu! Hiwalifwa ni yetu!

¹¹ Uhenya we haunungwina mu Shiole hamwe ni liji lia yisaji ye ya kusa. Mavuno mapwa chisalo che ni misangwinya kanyime ke.

¹² Walimbuka Chichize kwilu, ena Lusiferu, mwana wa kucha! Hakupakula hashi, ena wanungwine mavungu!

¹³ Yiwamba mu mbunge ye ngwe, Mungukanduka ku malilu; mungusa ngunja yami helu lia matongonoshi a Zambi; mungutwama ha mulundu wa chikungulwila kuze kanda ku Norte.

¹⁴ Mungunyina helu lia manangamo a malelwa, mungulifwisa ni mwe Chitunda.

¹⁵ Alioze hanakunyase ndo ku Shiole, he ha mashima ja jondo.

¹⁶ Waze makumona makuhulikila meso, ni kukuzewula ngwo, Mwenawo wachikimishine hashi, nikunyikisa mavungu?

¹⁷ Mwenawo wapwishile hashi ngwe puya nikununguna yihunda yaho, katayijile funge jenyi kuya ku mahio?

¹⁸ Mianangana eswe a mavungu kanapombo ni uhenya, mweswe mu fuka lienyi;

¹⁹ alioze yena hakumbila kusuku ni fuka lie, ngwe umwe wa kuvwisa lwaji, wa kufuka ni mijimba ya waze haashiha, waze haatuwa tutana, akupalumuka ndo ku mawe a mu jondo, ngwe mujimba wa mufu wa kuliachila mu mavu.

²⁰ Kechi kukusa hamwe no ha kukufunda mumu hiwenyeka chifuchi che, hiwashiha atu je. Kanda avuluka nilimwe tangwa ana ja yihenge!

²¹ Lulikenu kushiha ana jenyi a malunga mumu ha mulonga wa atato, kuchina hanji makatuka ni kuzuka hashi, ni kuzalisa hano hashi ni yihunda yo.

²² Yehova-wa-Tujita ngwenyi, Mungwakatukila nikuteta ku Babilonia ni lie jina, ni masalila, ni ana, ni ajikulu. Chocho kanambe Yehova.

²³ Munguyitenga chihinga cha yisekele ni yitende ya meya, ni mungukombaho ni lukombo wa kwonwona. Chocho kanambe Yehova-wa-Tujita.

²⁴ Yehova-wa-Tujita hanalishingi ngwenyi, Kumuchikapwa chizechene ngwe hinapala. Kumuchikakola chizechene ngwe hinafunjika ngwami,

²⁵ Mungumakuna mwe Ka-Asuria mu chifuchi chami, mungumuliachila ha milundu yami; kanga yenyi muyiakatuka, ni chiteli chenyi muchikatuka ha yipaya yo.

²⁶ Che chikuma hanapale ha kutwala ku hashi heswe chenacho. Ni lie kwoko lia kuzoza helu lia mavungu eswe lienalio.

²⁷ Mumu Yehova-wa-Tujita hapala, mba iya machilelesa? Hazoza kwoko lienyi, mba iya malihilwisa?

²⁸ Ha mwaka afwile Ahaze kwejile liji lino ngwo,

²⁹ Enu A-Filistea, kanda nuwahilila eswe, mumu mbwechi anulambile nayo hiyamakuka, alioze ku chikota cha lunoka mukusemuka fwiji, ni mwana wa iye makapwa toto.

³⁰ Kapula-jimo wa chiswale kumakalia, ni mukwa kuhona makapomba kanawa; alioze munyachi wenu munguushiha ni zala, ni masalila jenu mungwashiha lume.

³¹ Lila mbimbi, ena chajilo! Tetwoka, ena limbo! Enu A-Filistea, eswe sangunukenu ni woma. Mumu mwishi unakatuka ku Norte, hakachi ka tujita twenyi kukushi mukwa kukokoloka.

³² Mutu kuchi makumbulula mikeji ja vungu lino? Ngwetu, Yehova hanakolesa Zaione, mba muli iye akwa lamba ja atu jenyi makawana uswamino.