Izaya 13 - MUKANDA USANDU WA ZAMBI 1975

¹ Chikuma cha Babilonia chize amwene Izaia mwana Amoze.

² Mikenu mbandeira ha mulundu wa hululu, tambikenu kuli ayo ni tachi; lahulenu ni moko akanjile mu yikolo ya alemu.

³ Yami mwene hinamba asandu jami, hinasanyika malunga jami a ndundo akalinge utenu wami, atu jami akwa kuwahilila ni kulikwiza.

⁴ Panjikenu, kuchungula ha milundu, ngwe mbunga yinene! Panjikenu, chizungozungo cha mawanangana, cha mavungu kulikungulula hamuwika. Yehova-wa-Tujita kanakungu mbunga ha jita.

⁵ Kanakatuka ku chifuchi kusuku, kwe ku songo lia malilu, Yehova ni yitwa ya ufwatulo wenyi, akenyeke hashi heswe.

⁶ Lilenu mbimbi, mumu tangwa lia Yehova hiliakundama; muliza ngwe kwenyeka cha kuli Mukwa-Ndundo-Jeswe.

⁷ Kashika moko eswe makazeya, ni mbunge ya mutu mweswe muyisangunuka,

⁸ makalishimwoka. Misongo ni yikola muyiakwata, ha kulifwita mapwa ngwe pwo mu kufumbajala. Makalitala umwe ni mukwo ni mwongo, meso jo ngengu.

⁹ Tangwa lia Yehova kulineza, lia uswi, ni ufwatulo, ni utenu usasu, akapwise hashi ngwe puya nikushiha akwa shili jaho.

¹⁰ Mumu matongonoshi a mwilu ni mbunga jo kechi katemuka; tangwa mulikalá ha kuvumbuka ni kakweji kechi katwa mweji.

¹¹ Mungukafwetesa akwa hashi ha yipi yo, mungukafwetesa yingulungulu ha uhenge wo. Mungukasulisa kulengumuka cha akwa kulizata, mungukanunguna kulifuza cha yiswi.

¹² Mungukapwisa malunga a kufupa ngwe oru yipema; e atu mahonako ngwe oru ya Ofiri.

¹³ Kashika mungukachikimisa malilu, ni hashi muhanyika homa haho, ku ufwatulo wa Yehova-wa-Tujita ha tangwa lia utenu wenyi usasu.

¹⁴ Mutu mweswe makatalikisa kuli atu jenyi mwene, mutu mweswe makachinyina ku chifuchi chenyi mwene, ngwe kai yoze anamuhange, ngwe mapanga keshi ni akwa kwakungulula.

¹⁵ Mweswe makamuwana mamutuwa ndusu, mweswe makamukwata mafwa ni katana.

¹⁶ Ana jo a kemba makaahwotola pusu kwe kumeso jo; mazuwo jo makaapupa, ni mapwo jo kupomba no.

¹⁷ Ngunavundula A-Media kulimika no. O keshi kupala prata, keshi kuwaha ni oru.

¹⁸ Mata jo kumakashiha akweze; kechi kavwila vumbi hali waze matuhuka mu jimo; kechi kavwila keke ana akepe.

¹⁹ Babilonia, uhenya wa yifuchi yeswe, ulamba ni kulengumuka cha A-Kaletea, kumuyikapwa ngwe Sondome ni Ngomora muze Zambi wayinungwine.

²⁰ Atu kechi katungako, chipwe kutwamako ndo ku yisemuko yeswe. Chipwe A-Arabia kechi kasako mbalaka jo, chipwe tufunga kechi kapombesako yimuna jo.

²¹ Alioze ngongo mautamakc, ni mazuwo jako mazala ni tushitu a kupozonoka. Yikungulu matwamako, ni mahamba a mu yambu masambako.

²² Yimbungu makateta mu tuposhi twako; mikuza makapwoza mu palasiu jako jipema. Tangwa lia yino yuma hiliakundama, matangwa jayo kechi kasuha.