Izaya 11 - MUKANDA USANDU WA ZAMBI 1975

¹ Kumukusoka mutombo umwe ku chimbunji cha Yese; mutango wa ku miji yenyi muukema mihuko.

² Spiritu ya Yehova makahwimina hali iye, Spiritu ya malinjekela ni yinyingi, Spiritu ya yiyulo ni ndundo, Spiritu ya mana ni woma wa Yehova.

³ Uwahililo wenyi muukapwa mu woma wa Yehova. Kechi kayula nikulita ni chize meso jenyi mamona; kechi kapatwila nikulita ni chize matwi jenyi mevwa;

⁴ alioze makayula yiswale ni ululi, makapatwila yimbovu a hashi, ni katonde ka. Kumakalamba hashi ni mbwechi ya mu kanwa lienyi, kumakashiha yingulungulu ni mwiku wa mivumbo yenyi.

⁵ Ululi muupwa muya wa mu zalilo yenyi, umwenemwene muupwa muya wa ha miongo yenyi.

⁶ Kangunga makatunga ni mwana-panga, ni changwi makapomba hamuwika ni mwana-pembe. Chimbembe cha ngombe, ni ndumba, ni chimuna cha maji, eswe mapomba hamuwika, ni mwana-kemba makaasongwela.

⁷ Ngombe ni ursu makalila hamuwika, ni ana jo makapomba hamuwika; ni ndumba makalia mwambu ngwe ngombe.

⁸ Mwana mukwa kwamwa maheha ha wina wa chihili, mwana yoze hamusumuna masa kwoko lienyi mu wina wa fwiji.

⁹ Niumwe mavwisa yikola hanji kwonwona mweswe mu mulundu wami usandu; mumu hashi muhazala ni chinyingi cha Yehova ngwe meya akufuka kalunga-lwiji.

¹⁰ Ha tangwa lize mutombo wa Yese muumana ngwe mbandeira kuli mavungu. Akwa mavungu mamufupa, ni zuwo lienyi mulipwa lia uhenya.

¹¹ Ha tangwa lize Mwene mazoza kwoko lienyi chisuho chamuchiali akahilwise masalila ja atu jenyi aze asala ku Asuria, ni ku Engitu, ni ku Patarose, ni ku Etiopia, ni ku Elame, ni ku Shinare, ni ku Hamate, ni ku yifuchi yeswe yasulangana ni kalunga-lwiji.

¹² Kumakamika mbandeira hali mavungu, kumakakungulula A-Izalele a kumbilambila, ni kukonga A-Yunda waze anamwangana ku mbango jiwana ja hashi.

¹³ Ukwa wa Eframe muumukatuka, ni akwa kusakalisa A-Yunda kumakasutuka. Eframe kechi kevwa ukwa wa Yunda, ni Yunda kechi kasakalisa Eframe.

¹⁴ Alioze kumakahulumukina ha chipaya cha A-Filistea ku Chitokelo; hamuwika kumakapupa akwa Chivumbuko. Kumakazoza moko jo kulimika ni A-Endome ni A-Moape, ni A-Amone maononokena.

¹⁵ Yehova majimuna liakulu limi lia kalunga-lwiji wa Engitu. Molola kwoko lienyi helu lia mwe Lwiji ni fuji yenyi ya chivukuminya. Mamupula akapwe yitwetwe shimbiali hanga atu akazauke ni sapato jo.

¹⁶ Kumukukapwa Chikoka cha kukatuka ku Asuria hali masalila ja atu jenyi aze asalako, ngwe chapwile hali A-Izalele muze akatukile ku chifuchi cha Engitu.