Izaya 10 - MUKANDA USANDU WA ZAMBI 1975

¹ Lamba kuli waze akukolesa shimbi ja uhenge, ni akwa kusoneka waze akusonyeka upinjiso,

² akachinde akwa kuhona kanda awana upatwilo, akeye chize chatela kuli yiswale ja atu jami. Ni twamishi kapwa upite wo wa kupunda, akatenge ana-ashiwa ngwe kulia cho.

³ Yika munulinga ha tangwa lia kunufwetesacho, mu kangonga yoze makatuka kusuku? Kuli iya munuchinyina amukwase? Kulihi munuhichika upite wenu?

⁴ Nichimwe chasala chakuhi shina kuutama hakachi ka funge, hanji kufwa hakachi ka waze anaashihi. Chipwe chocho utenu wenyi kuwakondolokele; kwoko lienyi hindu kanalizozo.

⁵ Ena Asuria, mbwechi ya utenu wami, mbulo ya ufwatulo wami!

⁶ Ngunamutumu kulimika ni vungu lia yingandangali. Ngunanwehe shimbi kulimika ni atu ja ufwatulo wami, akatambule upite akapunde yikumba, akaaliate ngwe malowa ha tapalo.

⁷ Alioze aye kachipalile chocho, ni manyonga jenyi kapwile chocho. Aye kananyongo kwenyeka, ni kutetaho mavungu anji.

⁸ Mumu kanambe ngwenyi, Tupitau twami hi mianangana ko?

⁹ Kalino kuchapwile chimuwika ni Karkemishi? Hamate kuchapwile chimuwika ni Arpade? Samaria kuchapwile chimuwika ni Ndamaseku?

¹⁰ Chizechene ngwe kwoko liami liahetele ku yifuchi ya mahamba, tuponya two a kwola akumba waze ali mu Yerusaleme ni Samaria;

¹¹ te chize hinalinga ku Samaria ni tuponya twako chichi kuchilinga ku Yerusaleme ni tuponya twako?

¹² Muze Mwene hamana milimo yenyi yeswe ha mulundu wa Zaione ni mu Yerusaleme kumakafwetesa kulisamba cha kulizata cha mwanangana wa Asuria ni kulengumuka chenyi cha kulifuza.

¹³ Mumu kanambe ngwenyi, Ku tachi ja kwoko liami mwene hinachilinga, ni ku mana jami, mumu yinyingi nguli nayo. Hinachiza manjiza ja atu, hinapunda upite wo. Ngwe kuji ya ngombe hinanunguna akwa kutwama ha ngunja.

¹⁴ Kwoko liami hiliawana upite wa mavungu ngwe chaswa; mba hinakunga hashi heswe ngwe atu kakwanda monda aze hanehuka. Niumwe hazundula pulwa, hanji hapakula kanwa lienyi akalinge pia.

¹⁵ Njimbu muyilisamba helu lia mukwa kulinga nayo milimo? Selalo muyilitohesa kulimika ni mukwa kuyikwata? Chapwa ngwe kachi mbwechi muyizundula yoze mayikwata, hanji mulumbu muuzundula yoze kapwile mutondo.

¹⁶ Kashika Mwene Yehova-wa-Tujita kumakatuma musongo wa kuwangama hakachi ka tujita twenyi a tachi, mba kushi lia uhenya wenyi munguvundula kusasaminya ngwe kulengenya cha kahia.

¹⁷ Pangu lia Izalele kumulikalumuka kahia, Musandu wenyi mapwa mulengi, mba muulekwoka ni kulalisa mingonga yenyi ni mikalale yenyi tangwa limuwika.

¹⁸ Uhenya wa usaki wenyi ni wa chifuchi chenyi cha mihuko Yehova mawonwona, ni alma ni mujimba. Muchipwa ngwe muze mukwa kuyiza mapokieka.

¹⁹ Mitondo yize muyilisala mu misenge yenyi muyitepuluka ndo mwana mweswawo mahasa kuyisoneka.

²⁰ Ha tangwa lize masalila ja A-Izalele ni waze kafwile a ku munyachi wa Yakomba, kechi kujamina nawa hali mukwa kwalamba, alioze majamina chamwenemwene hali Yehova, mwe Musandu wa Izalele.

²¹ Masalila kumakahiluka, masalila ja Yakomba kumakahiluka kuli Zambi ya ndundo.

²² Mumu chipwe atu jenu A-Izalele mapwa ngwe masekeseke a ha ngenge ya kalunga-lwiji, masalila wika mahiluka. Hanakolesa shimbi ya kunonga alioze muchikapukuka ni ululi.

²³ Mumu Mwene Yehova-wa-Tujita kumakamanununa lu hakachi ka hashi heswe ngwe hanakolesa shimbi.

²⁴ Kashika Mwene Yehova-wa-Tujita kanambe ngwenyi, Enu atu jami nwatwama mu Zaione, kanda nwivwa woma wa A-Asuria muze manulamba ni mbwechi, ni kuzundula mbulo kulimika ni yenu chizechene ngwe A-Engitu alingile.

²⁵ Mumu kashimbu kakepe ni ufwatulo wami muusula, ni utenu wami muutalikisa kwanongesa.

²⁶ Ni Yehova-wa-Tujita makaalamba ni shikote ngwe walambile A-Mindiane ku luliwe lwa Orepe. Mulumbu wenyi muupwa ha kalunga-lwiji, mauzundula ngwe walingile mu Engitu.

²⁷ Mba ha tangwa lize chiteli chenyi muchikatuka ha chipaya chenu, ni kanga yenyi mayichiza ha kota yenu, ni ye kanga mayishiha mumu ha maji.

²⁸ Haheta ku Aiate; hahiana ndusu mu Migrone; hatulikila yikwata yenyi ku Mikimashi.

²⁹ Hapalika mu jila ya hakachi ka milundu, chipombelo ku Ngeba. Rama kanachikima, Ngibia ya Saulu hachina.

³⁰ Kalumioka mwana Ngalimi! Panjika ena Laisha! Mukumbulule ena Anatote!

³¹ Mademena kanachina, akwa Ngebime kanayi fuji kufupa uswamino.

³² Tangwa lia musono mamanyina ha Nobe ni kunuzozela kome, ku mulundu wa mwana-pwo Zaione, mulundu wa Yerusaleme.

³³ Talenu, Mwene Yehova-wa-Tujita masemba mitango ni tachi ja kukolesa mwongo. Yindululu kumakaateta; akwa kunangama kumakaanunguna.

³⁴ Kumakateta yitandulwila ya usaki ni njimbu, Lebano ni mitondo yako ya uhenya muyikanunguka.