Izaya 1 - MUKANDA USANDU WA ZAMBI 1975

¹ Usolwelo wa Izaia mwana Amoze, uze amwene ha kutwala kuli A-Yunda ni A-Yerusaleme, ha matangwa a Uzia, ni Yotame, ni Ahaze, ni Hezekia, mianangana ja Yunda.

² Malilu, panjikenu. Hashi, neha matwi je. Mumu Yehova hanahanjika. Hinalela ana ni kwahoka, alioze hanangukatukila.

³ Ngombe kananyingika kakó, ni chimbulu kananyingika chililo cha yoze wamuyula; alioze A-Izalele kanyingikine, kuchalumbunukine kuli atu jami.

⁴ Enu vungu lia yivulumunyi, atu alemewa ni uhenge, ana ja akwa kulinga chipi, ana aze akulinga luchisa! Hanehuka Yehova, hanalelesa Musandu wa A-Izalele, hanalihandununa liakulu ni yami.

⁵ Kuchi te munulikoleza kukolema? Kuchi te manulambalamba nawa? Mutwe weswe unayiji, mbunge yeswe yinalezumuka.

⁶ Chize ku chiliato ndo ku mutwe niumwe ungunu kuushiko, alioze yindundwola, ni yilonda, ni mbandu ja kuhita manyinga jize kanda ajipalakenya chipwe kujichika, chipwe kujovulisa ni maji.

⁷ Chifuchi chenu chapwa cha hululu; yihunda yenu hanayocho ni kahia; yilambala kanali chifuchi chenu kwe kumeso jenu; chapwa cha hululu, ngwe hanachipupu kuli yilambala.

⁸ Mwe mwana-pwo Zaione hanamuhichika ngwe chikulika mu munda wa uva; ngwe chisakila mu munda wa kasakwa, ngwe chihunda hanachiseleka.

⁹ Nyi kachi Yehova-wa-Tujita katuhichikilile amwe akehe a kulisalaho, kachi twapwa ngwe Sondome, kachi twalumuka ngwe Ngomora.

¹⁰ Ivwenu liji lia Yehova enu akwa kuyula Sondome! Panjikenu longeso lia Zambi yetu, enu atu a Ngomora!

¹¹ Yehova kanambe ngwenyi, Kulumbama cha yitapo yenu kuchi chapwa kuli yami? Janguhwa ni milambu ya kuji a mapanga a kulumba ni maji a yimuna a kutohesa; chevwile kuwaha ni manyinga a ngombe, hanji a ana-mapanga, hanji a kuji a pembe.

¹² Muze munwiza kusoloka kumeso jami, iya wanwichile kuliataliata chocho mu maze jami?

¹³ Kanda nuneha nawa milambu yamokomoko; insensu yakunguvwisa lwaji. Kakweji mwaha, ni masambata ni yikungulwila ya mitambi; Chahashile kumona nawa uhenge ni yikungulwila yilemu.

¹⁴ Yiwanyino yenu ya kakweji mwaha ni yikungulwila yenu ya kutongola mbunge yami hiyayivwila kole; hiyinalumuka chuma cha kungusakalisa, janguhwa ni kulihumikiza nayo.

¹⁵ Muze munuzoza moko jenu, mungunuswekela meso jami; chipwe munulemba lembie-e-e, chichi kunwivwa. Moko jenu hazala ni manyinga.

¹⁶ Sanenu, lipemesenu, Chizenu che chipi cha yitanga yenu kumeso jami, litwaminenu kulinga chipi;

¹⁷ lilongesenu kulinga yipema; fupenu ululi; yulenu uswi; fungenu ana-ashiwa, hakwilenu tuliwa.

¹⁸ Yehova kanambe ngwenyi, Tweyenu tulishimwinye hamuwika. Chipwe milonga yenu yachila nge, kumuyipwa yitoma ngwe neve. Chipwe yahiana kuchila, muyalumuka ngwe wanda utoma.

¹⁹ Nyi munwononoka ni mbunge munukalia yipema ya chifuchi;

²⁰ alioze nyi munukwata pami ni kukolema, munukanonga ni katana, mumu kanwa lia Yehova hilinahanjika.

²¹ Tala chihunda chize chapwile chamwenemwene, hichalumuka chikoi, chapwile cha tò ni upatwilo wa kulita. Te ululi Watwamine muli iye, alioze haliapwila yingalwe wika.

²² Prata yenu hiyalumuka yinganga, vinyu yenu yachingiwa ni meya.

²³ Alemu jenu o akwa kukolema, masepa je eji. Mutu mweswe kanazange chindo, kakufupa chijiko. Kafungile ana-ashiwa, ni chikuma cha tuliwa kuchaahetele.

²⁴ Kashika Mwene kanambe, mwe Yehova-wa-Tujita, mwe Mukwa-Ndundo wa Izalele ngwenyi, Munguzukwila ufwatulo hali akwa kole jami; mungufwetesa akwa kulimika ni yami.

²⁵ Mungutalikisa kwoko liami likalimike ni yenu, mba mungusangununa yinganga ye ngwe ni sabau nikuchiza yuma yeswe ya kuchinga.

²⁶ Mungutwamisa ngaji jenu nawa ngwe apwile hatangu, ni tuliamanga jenu ngwe ha uputukilo. Mba kulutwe manutongola ngwo, Chihunda cha ululi, chihunda chamwenemwene.

²⁷ Makakula Zaione ni umwenemwene, ni waze malikonyekenamo makaakula ni ululi.

²⁸ Alioze akwa kukolema ni yivulumunyi maonwona hamuwika, ni akwa kwehuka Yehova maanongesa.

²⁹ Mumu munuvwila sonyi mitondo yize ya carvalho yize nwawahililile nayo; sonyi mujinujimbisa mitwe mumu ha jardine jize hinwatongola.

³⁰ Mumu yenu munulifwa ni mutondo wa carvalho uze walela mafwo, ngwe jardine yize kuyishi meya.

³¹ Mukwa tachi malumuka ngwe uhu, ni milimo yenyi muyipwa leka lia kahia, yeswe ni yiali muyiwema hamuwika, ni yoze mayijima wakuhi.