Hosea 8 - MUKANDA USANDU WA ZAMBI 1975

¹ Senu chitavwi ku mivumbo yenu, mumu pupa kanahulumuka ha zuwo lia Yehova. Mumu hanatangula usendo wami hanavulumuna shimbi jami.

² Kakusanyika kuli yami ngwo, Zambi yami, etu A-Izalele tunakunyingika.

³ Izalele halituna chipema. Akwa kole mamuhanga.

⁴ Alingile mianangana, alioze hi ni yami ko. Amikine alemu, ami chachinyingikine. Alingile mahamba ja prata ni oru a kulionwona ene.

⁵ Hinambila mwana-ngombe wa yena Samaria. Utenu wami unaalekwokela. Mwaka uka meza kupema?

⁶ Mu Izalele umwe chilangaji wamulingile alioze iye hi Zambi ko. Makafwenyona mwana-ngombe wa Samaria.

⁷ Kakukuwa fuji, mba kumakacha chijimbi. Tiliku mu minda kuyishi mitwe, kuyichi kuhana wunga. Chipwe kachi muyikahana, hindu yilambala makayilia.

⁸ Izalele hanamuli; hanayi kulu hakachu ka mavungu, ngwe chisashili.

⁹ Mumu hanayi ku Asuria, ngwe chimbulu wa mu yambu wakwenda ukawenyi. Eframe kanafwete akwa kumuzanga.

¹⁰ Chipwe mafweta akwa kwakwasa hakachi ka mavungu fuji mungwakonga. Mba makalitwamina ha shimbu limwe ku chiteli cha mianangana ni alemu.

¹¹ Mumu Eframe hanokesa yilumbilo ya kuvulumuna, hiyalumuka kuli iye yilumbilo ya shili.

¹² Chipwe mungumusonekena shimbi jami ha kumi lia tununu, hindu malimona ngwe chuma cheka.

¹³ Ha kutwala ku yitapo ya milambu yami, o kakushiha yifwo ni kuyilia, alioze Yehova kuyamupemenene. Haliapwila mewuluka uhenge wo, maaha kastigu ya milonga yo; makahiluka ku Engitu.

¹⁴ Izalele hanavulama Tangi yenyi, hatunga palasiu. Yunda hanokesa yihunda ya kukolesa, alioze mungutuma kahia ha yihunda yenyi, mukalalisa mbonge jenyi.