Hosea 7 - MUKANDA USANDU WA ZAMBI 1975

¹ Muze munguhilwisa kuwaha cha atu jami, muze munguwuka Izalele, uhenge wa Eframe unasoloka ni yitanga ya ungulungulu ya Samaria; mumu kakulinga ni mahuza; eji kakulokola mazuwo, ni yingumba kakupupa mu majila.

² Hindu kazewile ngwe yami mungwiwuluka yitanga yo yeswe yipi. Haliapwila yilinga yo hiyaalimba; kuyili kumeso jami.

³ Kakuwahisa mwanangana ni ungulungulu wo, kakuwahisa alemu ni mafwefwe jo.

⁴ O kapwa eswe akwa utanji. Kapwa ngwe jiko lia kahia, mukwa kulinga mbolo kechi kulisosela nawa ndo maweza futunwiso ku mbolo yize hachika kulu.

⁵ Ha tangwa lia mwanangana wetu alemu ayijile ni chivukuminya cha vinyu. Wazozele kwoko lienyi hamwe ni akwa kulenya.

⁶ Mumu mbunge jo kujakuyila ngwe jiko ni yuma ya kutaka. Ufuku weswe utenu wo kuwakulengenya mba ha chimene wakulekwoka ngwe milengi ya kahia.

⁷ Eswe kali ni chivukuminya ngwe jiko; kakulalisa akwa kuyula jo. Mianangana jo eswe hanalimbuka alioze kangusanyikine niumwe.

⁸ Eframe hanalifutula ni mavungu; Eframe kapwa ngwe mbolo yize kayalumwine ha jiko.

⁹ Yilambala kanali tachi jenyi; kachinyingikine. Kambu jitoma haputuka kupwa najo; kachinyingikine.

¹⁰ Kulengumuka cha Izalele chakumushindakenya hindu kahilukile kuli Yehova Zambi yo, chipwe kumufupa ha yino yuma yeswe.

¹¹ Eframe kapwa ngwe katele keshi mana, keshi yinyingi. Kakutambika A-Engitu; kakuya ku Asuria.

¹² Shimbu machiyako mungwatela wanda wami; mungwalimbula hashi ngwe tujila a mu tetela; mungwaaha kastigu ya yitanga yo ya ungulungulu.

¹³ Lamba lio mumu hanahambuluka kuli yami! Akaonwone, mumu hanangukatukila! Ami ngunafupu kwakula, alioze kakuhanjika mahuza a kulimika ni yami.

¹⁴ Katambikile kuli yami ni mbunge, alioze ha mihela yo kakulila mbimbi. Kakukungulukila mbuto ni vinyu; kakungukatukila.

¹⁵ Chipwe naalongesele ni kutakamisa moko jo hindu kakutaka yipi ya kulimika ni yami.

¹⁶ Kakutala kuli Mbale; o kapwa ngwe uta wa mafwefwe. Alemu jo makafwa ni katana mumu ha shino lia malimi jo. Chocho maakekuna mu chifuchi cha Engitu.