Hosea 6 - MUKANDA USANDU WA ZAMBI 1975

¹ Tatuyenu tukahiluke kuli Yehova, mumu iye hatupapulula, mba iye matuwuka. Iye hatulamba, mba iye matukasakasa.

² Kulutwe lia matangwa aali matuhuzulula; ha tangwa liamuchitatu matuhindwisa, hanga tukende kumeso jenyi.

³ Tunyingike, tuyenu kulutwe tunyingike Yehova. Kutuhuka chenyi cha pundu, ngwe kuvumbuka cha tangwa. Iye meza kuli yetu ngwe vula wa chehu; ngwe vula musazu yoze wakutuchikisa hashi.

⁴ Ngulinge yika ni yena Eframe? Ngulinge yika ni yena Yunda? Zango lie Hapwa ngwe lelwa lia chimene; ngwe mume uze wakuya washiwashi.

⁵ Kashika hinaateta ni aprofeta; hinaashiha ni maliji a mu kanwa liami. Upatwilo wami unatuhuka ngwe pangu.

⁶ Mumu nakuzanga utu wa zango, chafupile yitapo; ngunafupu yinyingi ya Zambi, hi milambu ya kulumba ko.

⁷ O hanatangula usendo chizechene ngwe Alama; hanalingi ni mafwefwe kuli yami.

⁸ Ngiliate yapwa chihunda cha akwa kulinga yipi, yinapiha ni manyinga.

⁹ Asasendote halikata hamuwika ngwe yingumba waze akujikinyina mutu. Kakushiha mu jila ya kuya ku Shekeme; ewa kakulinga ungulungulu.

¹⁰ Mu munyachi wa Izalele hinamona chuma cha lwaji. Ukoi wa Eframe ulimo. Izalele halipihisa.

¹¹ Ni yena Yunda kucha che hanakufunjikilacho.