Hosea 5 - MUKANDA USANDU WA ZAMBI 1975

¹ Enu asasendote, ivwenu chino! Enu munyachi wa Izalele, panjikenu! Enu munyachi wa mwanangana, halakanenu! Upatwilo unatwala kuli yenu, mumu hinwapwa kambwila ku Mizepa, hinwapwa wanda wa kuta ku Tabore.

² Akwa kukolema hatwala kusuku ni yitapo, alioze mungukaakanjisa eswe.

³ Ngunanyingika Eframe, Izalele kahashile kunguswamina, mumu, yena Eframe, hiwalinga ukoi; ena Izalele hiwalichisa.

⁴ Yitanga yo kuyaatayijile kuhiluka kuli Zambi yo. Mumu mbunge ja ukoi ali najo, chikwo nawa Yehova kamunyingikine.

⁵ Kulengumuka cha Izalele chakumushindakenya kumeso jenyi; Eframe matalinga ni uhie wenyi; Yunda nawa matalinga hamwe no.

⁶ Makaya kufupa Yehova ni mapanga jo ni ngombe jo, alioze kechi kamuwana; mumu hanakatuka kuli ayo.

⁷ Halinga ni mafwefwe kuli Yehova, mumu hasema ana ja yilambala. Haliapwila makahwa ni kakweji mwaha hamwe ni minda yo.

⁸ Humuna njalamina mu Ngibia; humuna chitavwi mu Rama. Sunga utoweze atu ku Mbete-Avene; ena Mbenjamine, chikima!

⁹ Eframe muyalumuka ya hululu ha tangwa lia kastigu. Ngunatoweza chuma chize chinakolo hakachi ka minyachi ya Izalele.

¹⁰ Alemu ja A-Yunda hanalumuka ngwe akwa kututulula njiza. Munguzukula ufwatulo wami hali ayo ngwe meya.

¹¹ Eframe kanamupinjisa, kanamufwenye mu upatwilo mumu wasele mbunge yenyi kukaula yuma yamokomoko.

¹² Kashika napwa kuli Eframe ngwe ndulu, ku munyachi wa Yunda napwa ngwe kafulefule.

¹³ Muze Eframe hamona musongo wenyi; muze Yunda hamona mbandu yenyi, mba Eframe wayile ku Asuria; yatuma kuli mwanangana wa kulitachika. Alioze aye kahashile kukuwuka chipwe kuwuka mbandu ye.

¹⁴ Mumu mungupwa ngwe ndumba kuli Eframe mungupwa ngwe mwevu wa ndumba ku munyachi wa Yunda. Yami, yami mwene mungupapulula ni kukatukako. Mungumbata mba niumwe malamwina.

¹⁵ Munguhiluka nawa kuma kwami, ndo matayiza uhie wo ni kufupa meso jami. Mu luyinda wo mangufupa ni mbunge yeswe, ngwo,