Hosea 4 - MUKANDA USANDU WA ZAMBI 1975

¹ Enu A-Izalele ivwenu liji lia Yehova mumu Yehova kanasumu akwa chifuchi. Mu chifuchi kushishika chakuhi, chipwe utu, chipwe kunyingika Zambi.

² Alioze chize chiliko, kutukana, ni mahuza, ni ungalwe, ni wiji, ni utanji. Kakuhiana shimbi jeswe; ungalwe unalitumbikila ha ungalwe.

³ Kashika chifuchi chinalinyenge, ni waze eswe atwamamo kanahongo, ni tushitu a mu yambu nawa, ni tujila a mu tetela, ni chipwe yishi a mu kalunga-lwiji kanaachiza.

⁴ Chipwe chocho niumwe kanda alitachika; niumwe kanda asuma mumu atu je kapwa ngwe waze analitachika ni sasendote.

⁵ Munutalinga ha mwalwa, ni profeta matalinga hamwe ni yenu ha ufuku. Mungwonwona noko.

⁶ Atu jami hanaonwona mumu ha kuhona yinyingi. Se hinwambila yinyingi, kashika ni yami ngunanumbila ku usasendote wami. Se hinwavulama shimbi ya Zambi yenu, ni yami nawa munguvulama ana jenu.

⁷ Cheswe anayi nikwoka chocho anaweze kunguvulumuna. Mungwalumuna uhenya wo ukapwe sonyi.

⁸ Kakulilisa ni shili ya atu jami, kakwivwa kuzo ha uhenge wo.

⁹ Mba muchikapwa cheswacho mapwa atu ni asasendote nawa chocho mapwa. Alioze mungwaaha kastigu mumu ha ndako jo, mungwafwetesa ha yitanga yo.

¹⁰ Malia alioze kechi kukuta; malinga ukoi, alioze kechi kuliokesa, mumu hanehuka Yehova akalalaminye ku ukoi.

¹¹ Ukoi ni vinyu kuyakuchiza mana, ni vinyu yaha nawa.

¹² Atu jami kakuhula ku chuma cha mutondo; umwe mulumbu wo kakwaaha maliji. Mumu mbunge ya ukoi hiyaapiangula; hanehuka Zambi yo akalinge ukoi.

¹³ Kakushiha yitapo ha mbulwa milundu; kakulambula ha mindundena mushi lia mitondo ya carvalho, ni alamo, ni terebine, mumu chihuhumuke chayo Chinapeme. Kashika anenu a mapwo kakulinga ukoi, ni ndungi jenu kakulinga utanji.

¹⁴ Chichi kuhana kastigu kuli anenu a mapwo muze malinga ukoi, chipwe ndungi jenu muze malinga utanji; mumu malunga ene kakuhambuluka ni yikoi nikushiha yitapo ni yikoi a ku matembele. Atu keshi mana kumakaonwona.

¹⁵ Chipwe yenu A-Izalele munulinga ukoi, hindu A-Yunda kanda anjila mu uhie. Kanda nunjila mu Ngilingali; kanda nukanduka ku Mbete-Avene; kanda nulishinga ngwenu, Ni mwono wa Yehova.

¹⁶ Ngwe chimbembe cha ngombe mukwa pami chocho japwa pami ja Izalele. Yehova te mahasa kwalisa ngwe mwana-panga mu ulilo unene?

¹⁷ Eframe hanalinungu ni mahamba, inwechenu!

¹⁸ Kunwa cho chipi; kakulikunjika ku ukoi; kakuzanga sonyi hi uhenya ko.

¹⁹ Fuji yimwe hiyaavunga mu mapulwa jayo, kumakevwa sonyi mumu ha yitapo yo.