Hosea 2 - MUKANDA USANDU WA ZAMBI 1975

¹ Amba kuli mandumbu je a malunga ngwe, Ami. Amba kuli mapangie ngwe, Ruhama.

² Lembelela kuli noko. Aye hi pwo liami ko, ami hi nguli lunga lienyi ko, kashika lembelela kuli iye; akambile ukoi wenyi kumeso jenyi, akachize utanji wenyi mu kondo.

³ Kuchina mungumuzula liakulu, ni kumupwisa ngwe tangwa lize asemukine. Hanji mungumupwisa ngwe puya, ngwe chifuchi chinomu chau lume, nikumushiha ni pwila.

⁴ Chichi kuvwila keke ana jenyi mumu o ana ja ukoi.

⁵ Mumu naye halinga ukoi, yoze waasemene halinga sonyi. Mumu iye hamba ngwenyi, Mungukaula akwa zango liami, waze akungwaha kulia chami ni meya a kunwa, kakungwaha wona wa mapanga, ni linyu, ni maji ni yuma ya kunwa.

⁶ Kashika mungushita jila yenyi ni mbimbo, mungumushichila lusaso hanga kechi kahasa kuwana majila jenyi.

⁷ Makakaula akwa zango lienyi kechi kaaheta. Makaafupa, alioze kechi kaawana. Mba makamba ngwenyi, Munguya kuli lunga liami mutangu mumu ha matangwa aze yuma yawahile, hi haliapwila ko.

⁸ Kanyingikine, yami namuhele mbuto, ni vinyu, ni maji, nikumwaha prata ni oru ya kulumbama, yize o alingilile nayo Mbale.

⁹ Kashika mungutambula nawa mbuto yami ha mwaka wayo ni vinyu yami ha mwaka wayo. Munguchiza wona wami wa mapanga, ni linyu liami, lize liapwile te lia kumufuka uselesele wenyi.

¹⁰ Mba mungutukula usolo wenyi kumeso Ja akwa zango lienyi. Niumwe mamupulula ku moko jami.

¹¹ Mungusulisa chiseke chenyi cheswe, ni yiwanyino yenyi, ni yikungulwila ya kakweji mwaha ni masambata, ni yiwanyino yenyi yeswe ya kufunjika.

¹² Mungukenyeka mitondo yenyi ya uva ni ya makuyu, yize ayambile ngwenyi, Fweto yami yenayo akwa zango liami anguhele. Mungukayipwisa usaki mba tushitu a mu yambu makayilia.

¹³ Mungukamwaha kastigu mumu ha yiwanyiho ya Ambale muze aochelele insensu, nikuliwahisa ni tuzeya ni yuma ya uhenya nikukaula akwa zango lienyi nikunguvulama yami. Chocho kanambe Yehova.

¹⁴ Kashika mungukamulembejeka, ni kumukoka ku puya, ni kuhanjika kuli iye ni vumbi.

¹⁵ Kwenako mungukamwaha minda ya uva, ni kupwisa chikulo cha Akore chikolo cha kutalatala. Kwenako makatá ngwe ha matangwa ja wana-mapwo wenyi, ngwe ha miaka muze machikatuka ku Engitu.

¹⁶ Yehova kanambe ngwenyi, Ha tangwa lize mukangutongola ngwe, Mukwetu-lunga. Kuchi kangutongola nawa ngwe, Mbale yami.

¹⁷ Mumu mungukachiza majina ja Ambale ku kanwa lienyi. Kechi kaatongola ni majina jo nawa.

¹⁸ Ha tangwa lize mungukakukolesela usendo ni tushitu a mu yambu, ni tujila a mu tetela, ni tututu a hashi. Mungukamakuna mu chifuchi, mata, ni tutana, ni jita. Mungukakupombesa kuze chipi chakuhi.

¹⁹ Mungukakumbata, yami mwene, ndo ku miaka yeswe. Mungukakumbata, yami mwene, ni ululi, ni upatwilo wa kulita, ni utu wa zango, ni keke.

²⁰ Mungukakumbata, yami mwene, ni umwenemwene mba kumukanyingika Yehova.

²¹ Yehova kanambe ngwenyi, Ha tangwa lize mungukasanyika malilu, ni malilu makasanyika hashi;

²² ni hashi muhasanyika mbuto, ni vinyu, ni maji; no masanyika Yezerele

²³ mba mungukamutumba hali yami mwene mu chifuchi. Mungukavwila keke Lo-Ruhama; kuli Lo-Ami mungukamba ngwami, Atu jami, mba iye makamba ngwenyi, Uli Zambi yami.